នៅរសៀលថ្ងៃព្រហស្បតិ៍ ទី៦ ខែមីនា ឆ្នាំ២០២៥ ឯកឧត្តម ចាន់ ចេស្តា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរពី ថ្នាក់ដឹកនាំមន្ទីរ សហការជាមួយរដ្ឋបាលស្រុកត្បូង ឃ្មុំ មេឃុំថ្មពេជ្រ មេភូមិ សហគមន៍ប្រើប្រាស់ទឹក ពិនិត្យសកម្មភាពកៀរពង្រាបដីស្រែដោយប្រព័ន្ធឡាហ្ស៊ែរ ក្នុងគម្រោងខ្សែច្រវាក់ផលិតកម្មដោយភាតរៈបរិស្ថាននៃក្រសួងកសិកម្ម រុក្ខាប្រមាញ់ និងនេសាទនិងជួបចុះសំណេះសំណាលជាមួយកសិករ ចំនួន ៤៣នាក់ ក្នុងភូមិថ្មពេជ្រ ឃុំថ្មពេជ្រ ខេត្តត្បូងឃ្មុំ។ 
លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានរាយការណ៍ឲ្យដឹងថា ការកៀរពង្រាបដីដោយប្រព័ន្ធឡាហ្រ៊ែរ អនុវត្តដោយគម្រោងខ្សែច្រវាក់ផលិត កម្មដោយភាតរៈបរិស្ថាន (CFAVC) នៃក្រសួងកសិកម្ម រុក្ខាប្រមាញ់ និងនេសាទ ដែលជាគម្រោងរបស់រាជរដ្ឋាភិបាលកម្ពុជា គាំទ្រថវិកាពីហិរញ្ញប្បទានរបស់ធនាគារអភិវឌ្ឍន៍អាស៊ី។
តាមផែនការការកៀរពង្រាបដីស្រែនៅខេត្តត្បូងឃ្មុំ លើផ្ទៃដី ៥៥០.៥៧ហិកតា ដោយបានជ្រើសរើសទីតាំងចំនួន ៦ ក្នុងស្រុកត្បូងឃ្មុំ ពញាក្រែក ក្រូចឆ្មារ និងស្រុកតំបែរ ដែលមានប្រព័ន្ធធារាសាស្ត្រអាចស្រោចស្រពដំណាំស្រូវមានដូចជា ៖
១.ប្រព័ន្ធធារាសាស្ត្រត្រពាំងត្រស់ នៅឃុំថ្មពេជ្រ ស្រុកត្បូងឃ្មុំ មានផ្ទៃដី ៥៨,៣០ហ.ត  មានកសិករទទួល ផល១៦៦ គ្រួសារ។ 
២.សហគមន៍កសិកម្មបារាយរុងរឿង ប្រព័ន្ធធារាសាស្ត្រត្បូងដំរី នៅឃុំឈូក ស្រុកក្រូចឆ្មារ មាន ផ្ទៃដី ១៤៥.២២ហ.ត មានកសិករទទួលផល ៧២ គ្រួសារ។
៣.សហគមន៍កសិកម្មតំបែររុងរឿង នៅឃុំតំបែរ ស្រុកតំបែរ មានផ្ទៃដី ៥៧.៨៧ហ.ត មានកសិករទទួលផល១៣១ គ្រួសារ។
៤.សហគមន៍កសិកម្មរំដួលដូនតី នៅឃុំដូនតី ស្រុកពញាក្រែក មានផ្ទៃដី ១៥១.៣៨ហ.ត មានកសិករទទួលផល ៣១៩ គ្រួសារ។
៥.សហគមន៍កសិកម្មកសិករតំបែរ ប្រព័ន្ធធារា សាស្ត្រជាំតាហឹង នៅឃុំទឹកជ្រៅ ស្រុកតំបែរ មាន ផ្ទៃដី ៣៨.៧៣ហ.ត មានកសិករទទួលផល៧៥ គ្រួសារ។
៦.សហគមន៍កសិកម្មសាមគ្គីកក់ នៅឃុំកក់ ស្រុកពញាក្រែក មានផ្ទៃដី ៩៩.០៧ហ.ត មានកសិករទទួលផល២១៤ គ្រួសារ។
ស្រូវ គឺជាដំណាំដ៏សំខាន់ក្នុងចំណោមដំណាំជា ច្រើនមុខទៀត។ ជំហានក្នុងការដាំដុះដំណាំស្រូវឲ្យទទួលបានជោគជ័យនិងក្នុងដំណាក់ដំបូង គឺការ រៀបចំដីឲ្យបានរាបស្មើល្អត្រឹមត្រូវតាមបច្ចេកទេស។ បច្ចុប្បន្នការកៀរពង្រាបដីស្រែដោយប្រព័ន្ធឡាហ៊្សែរ គឺជាការរួមសហការរវាងដៃគូពាក់ព័ន្ធជាច្រើន ដើម្បីជំរុញការរៀបចំដីដាំដុះដំណាំស្រូវ ប្រកប ដោយប្រសិទ្ធភាព និងនិរន្តរភាព ទាំងនៅទីវាល និងក្នុងខ្សែច្រវាក់តម្លៃស្រូវអង្ករ។ ការកៀរពង្រាបដីស្រែដោយប្រព័ន្ធឡាហ៊្សែរ បានបញ្ជូលបច្ចេកវិទ្យាថ្មីក្នុងការរៀបចំដីកសិកម្មដោយកៀរពង្រាបដីរាប ស្មើល្អ ក្នុងគោលបំណងកាត់បន្ថយការប្រើប្រាស់ទឹក ប្រើប្រាស់ជីមាន ប្រសិទ្ធភាព បង្កើនទិន្នផល និងដើម្បីបន្សាំទៅនឹងការប្រែប្រួលអាកាសធាតុបច្ចុប្បន្ននេះ។ ប្រសិទ្ធភាពនៃការកៀរពង្រាបដីស្រែឲ្យបានរាបស្មើ នឹងធ្វើឲ្យប្រសើរឡើងនូវទិន្នផលស្រូវ កាត់បន្ថយពេលវេលាប្រតិបត្តិការផ្សេងៗទៀត ដើម្បីគ្រប់គ្រងកត្តាចង្រៃ នឹងធ្វើឲ្យស្រូវចេញផ្កា ផ្លែ ទុំស្រុះគ្នា ទំហំគ្រាប់ប៉ុនគ្នា ព្រមទាំងបង្កើនទាំងគុណភាពគ្រាប់ មានភាពងាយស្រួល ដល់ប្រតិបត្តិការសម្រាប់គ្រឿងយន្តកសិកម្មនិងឧបករណ៍សិកម្ម មុននិងក្រាយប្រមូលផល ហើយចំណុចពិសេសគឺ ពេលកិនស្រូវទទួលបានអង្ករដើមល្អ ត្រូវស្តង់ដារដែលរោងម៉ាស៊ីនកិនស្រូវទទួលទិញ។ ចំណេះដឹងពីមូលដ្ឋានលើ បច្ចេកទេសកៀរពង្រាបដីស្រែដោយប្រព័ន្ធឡាហ៊្សែរ និងការរៀបចំដីកសិកម្មឲ្យបានល្អ ជាសូចនាករក្នុងការពង្រីក ផ្ទៃដីដាំដុះ និងការរៀបចំដីស្រែឲ្យបានត្រឹមត្រូវតាមបទដ្ឋានបច្ចេកទេសសមស្របទៅនឹងក្សេត្របរិស្ថាន គាំទ្រដល់ មុខរបរធ្វើកសិកម្មរបស់ប្រជាកសិករនិងបង្កើនប្រាក់ចំណូលក្នុងគ្រួសារ។ 
ក្នុងឱកាសជួបសំណេះសំណាល ឯកឧត្តម ចាន់ ចេស្តា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានសំដែងនូវការអបអរសាទរចំពោះរបស់បងប្អូនដែលទទួលបានការគាំទ្រពីរាជរដ្ឋាភិបាលកម្ពុជា នីតិកាលទី៧ នៃរដ្ឋសភា ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈ គម្រោងខ្សែច្រវាក់ផលិតកម្មដោយភាតរបរិស្ថាននៃក្រសួងកសិកម្ម រុក្ខាប្រមាញ់ និងនេសាទ ដែលនៅតែកំណត់ កសិកម្មជាវិស័យអាទិភាព ដែលបានជួយរក្សាសន្តិសុខស្បៀងផង ជាចំណូលរបស់គ្រួសារកសិករផង បង្កើតការងារ ផង និងគាំទ្រដល់ចរន្តសេដ្ឋកិច្ចជាតិផងដែរ។ រាជរដ្ឋាភិបាលកម្ពុជា នីតិកាលទី៧នៃរដ្ឋសភា បានដាក់ចេញនូវកម្មវិ ធីគោលនយោបាយទី៥និងទី៦ សម្រាប់វិស័យកសិកម្ម សំដៅលើកកម្ពស់ផលិតភាពកសិកម្ម គុណភាពកសិផល ស្ថេរភាពថ្លៃ និងនិរន្តរភាពទីផ្សារ តាមរយៈការបង្កើតសហគមន៍កសិកម្មទំនើប ការដាក់មន្ត្រីកសិកម្មឃុំ គ្រប់ឃុំ ព្រមទាំងផ្តល់ហិរញ្ញប្បទាន ១០០លានដុល្លារ គាំទ្រដល់សហគមន៍កសិកម្មលើកកម្ពស់ខ្សែច្រវាក់តម្លៃផលិតកម្ម កសិកម្ម។