១.ស្ថានភាពភូមិសាស្រ្ត និងប្រជាសាស្រ្ត

            ខេត្តត្បូងឃ្មុំ ត្រូវបានបង្កើតឡើងតាមព្រះរាជក្រឹត្យលេខ នស/រកត/១២១៣/១៤៤៥ ចុះថ្ងៃទី៣១ ខែធ្នូ ឆ្នាំ២០១៣ មានចម្ងាយ ១៧២គ.ម ភាគឥសានពីរាជធានីភ្នំពេញ មានព្រំប្រទល់ខាងជើងជាប់ខេត្តក្រចេះ ខាងកើតជាប់ខេត្តតៃនីញនិងខេត្តប៊ិញភឿក នៃប្រទេសវៀតណាម ខាងត្បូងជាប់ខេត្តព្រៃវែង និងខាងកើតជាប់ខេត្តកំពង់ចាម គ្របដណ្តប់លើផ្ទៃដី ៥២៥០,៥១គីឡូម៉ែត្រក្រឡា ចែកចេញជាស្រុក ៦ ក្រុង ១ ដោយចែកជា ៦២ឃុំ និង ២សង្កាត់ ស្មើនឹង ៨៦៥ភូមិ ។ គិតត្រឹមឆ្នាំ២០១៥ ខេត្តត្បូងឃ្មុំ មានប្រជាពលរដ្ឋ ១៨៥ ៨៥០គ្រួសារ មនុស្សរាយ ៨៤៤ ៨៥៣នាក់ ក្នុងនោះស្រី ៤២៨ ៨៣២នាក់។ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់បំផុត សម្ពោធដាក់ឲ្យប្រើប្រាស់ជាផ្លូវការសំណង់អគាររដ្ឋបាលខេត្ត មន្ទីរ អង្គភាព និងហេដ្ឋារចនាសម្ព័ន្ធទីក្រុងទីរួមខេត្ត កាលពីថ្ងៃទី៩ ខែឧសភា ឆ្នាំ២០១៧។  ខេត្តត្បូងឃ្មុំ មានព្រំប្រទល់ជាប់ជាមួយប្រទេសវៀតណាមក្នុងប្រវែង ១៤៣គ.ម ក្នុងនោះស្រុកមេមត់ប្រវែង ១០១គ.ម និងស្រុកពញាក្រែកប្រវែង ៤២គ.ម រួមមានច្រកអន្តរជាតិចំនួន ១ (ច្រកត្រពាំងផ្លុង) ច្រកទ្វេរភាគីចំនួន ២ រួមមាន ច្រកដារនិងច្រកទន្លេចាម ច្រកតំបន់ចំនួន ៣ រួមមាន ច្រកចាន់មូល ទន្លូង និងច្រកដូនរ័ត្ន។

២.តួនាទីនិងភារកិច្ចមន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ

          មន្ទីរកសិកម្មរាជធានី ខេត្ត ជាអង្គភាពថ្នាក់មូលដ្ឋានរបស់ក្រសួងកសិកម្ម រុក្ខាប្រមាញ់ និងនេសាទ មានបេសកកម្មដឹកនាំ គ្រប់គ្រង និងធ្វើសកម្មភាពវិស័យកសិកម្មនៅក្នុងក្របខ័ណ្ឌរដ្ឋបាលរាជធានី ខេត្ត របស់ខ្លួន។

មន្ទីរកសិកម្មខេត្តមានមុខងារនិងភារកិច្ចដូចតទៅ ៖

• លើកផែនការដឹកនាំនិងជំរុញការអនុវត្តកិច្ចអភិវឌ្ឍវិស័យកសិកម្មនៅក្នុងរាជធានី ខេត្ត ស្របតាមគោលនយោបាយរបស់ក្រសួងកសិកម្ម  រុក្ខាប្រមាញ់ និងនេសាទ ។
• គ្រប់គ្រងទិន្ន័យកសិកម្មគ្រប់ជំនាញ លើកគម្រោងផែនការនិងវិធានការអភិវឌ្ឍវិស័យកសិកម្ម
• លើកគម្រោងកម្មវិធីចំណូល ចំណាយ តាមដានពីការអនុវត្តនិងប្រមូលចំណូលក្នុងវិស័យកសិកម្មបង់ចូលថវិករដ្ឋ
• គ្រប់គ្រងមន្ត្រីរាជការ ថវិកា ទ្រព្យសម្បត្តិរដ្ឋរបស់មន្ទីរកសិកម្ម ខេត្ត ឲ្យបានត្រឹមត្រូវតាមគោលការណ៍ច្បាប់
• រៀបចំកម្មវិធីបណ្តុះបណ្តាលនិងបំពាក់បំប៉ន ពង្រឹងសម្ថភាពមន្ត្រីបុគ្គលិក
• ផ្សព្វផ្សាយ ជម្រុញ ណែនាំ និងត្រួតពិនិត្យ អនុវត្តបណ្តាវិធានការបច្ចេកទេសក្នងវិស័យកសិកម្មគ្រប់ផ្នែកដល់ការិយាល័យអង្គភាពចំណុះ បណ្តាការិយាល័យកសិកម្មក្រុង ស្រុក ខណ្ឌ និងមណ្ឌលកសិកម្មឃុំ សង្កាត់
• ផ្តល់ការគាំទ្រនិងផ្ទេរបច្ចេកទេសក្នុងវិស័យកសិកម្មគ្រប់ផ្នែក ដល់កសិករនិងដៃគូចូលរួម និងលើកទឹកចិត្តអង្គការវិជ្ជាជីវៈសមាគមនានានិងបង្កើតសហគមន៍អភិវឌ្ឍនានាដែលពាក់ព័ន្ធនឹងវិស័យកសិកម្មដើម្បីកែលម្អផលិតកម្មនិងផលិតភាពក្នុងវិស័យកសិកម្មគ្រប់ផ្នែក
• ចូលរួម សហការក្នុងការអនុវត្ត វិធានការពារ ធនធានធម្មជាតិក្នុងវិស័យកសិកម្មគ្រប់ផ្នែក តាមការកំណត់នយោបាយអភិវឌ្ឍ អភិរក្សរបស់ក្រសួង
• ចាត់ចែងការងារអន្តរាគមន៍ ទប់ស្កាត់​បង្ការ និង​រាយការណ៍សុំយោបល់ជាបន្ទាន់ពីរដ្ឋបាលរាជធានី ខេត្ត និងក្រសួងនូវបណ្តាសមាសភាព ភយន្តរាយ​ គ្រោះធម្មជាតិ ភាពអនាធិបតេយ្យលើវិស័យកសិកម្មគ្រប់ផ្នែកដែលកើតមាន
• ធ្វើជាដៃគូដ៏ល្អនិងមានប្រសិទ្ធភាពក្នុងកិច្ចសហការ និងកិច្ចសហប្រតិបត្តការជាមួយបណ្តាមន្ទីរនានាអង្គការ និងម្ចាស់ជំនួយនានា សម្រាប់ការអភិវឌ្ឍវិស័យកសិកម្មនៅក្នុងខេត្ត រាជធានី
• ទទួលអនុវត្តភារកិច្ចផ្សេងៗទៀតដែលថ្នាក់ដឹកនាំក្រសួងប្រគល់ឲ្យ ។

៣.មន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ មានខណ្ឌ ការិយាល័យជំនាញចំណុះឱ្យមន្ទីរ និងកសិកម្មស្រុកក្រុង ដូចខាងក្រោម៖

១. ការិយាល័យរដ្ឋបាល បុគ្គលិក
២. ការិល័យផែនការ គណនេយ្យ
៣. ការិយាល័យនីតិកម្មកកសិកម្ម
៤. ការិយាល័យផលិតកម្មនិងបសុព្យាបាល
៥. ការិយាល័យក្សេត្រសាស្ត្រនិងផលិតភាពកសិកម្ម
៦. ការិយាល័យផ្សព្វផ្សាយកសិកម្ម
៧. ការិយាល័យគ្រឿងយន្តកសិកម្ម
៨. ការិយាល័យអភិវឌ្ឍន៍សហគមន៍កសិកម្ម
៩. ការិយាល័យកសិឧស្សាហកម្ម
១០. ការិយាល័យកៅស៊ូ
១១. ខណ្ឌរដ្ឋបាលព្រៃឈើត្បូងឃ្មុំ
១២. ផ្នែករដ្ឋបាលព្រៃឈើមេមត់
១៣. ផ្នែករដ្ឋបាលព្រៃឈើត្បូងឃ្មុំ
១៤. សង្កាត់រដ្ឋបាលព្រៃឈើមេមត់
១៥. សង្កាត់រដ្ឋបាលព្រៃឈើក្រូចឆ្មារ
១៦. សង្កាត់រដ្ឋបាលព្រៃឈើតំបែរ
១៧. ខណ្ឌរដ្ឋបាលជលផលត្បូងឃ្មុំ 
១៨. ផ្នែករដ្ឋបាលជលផលត្បូងឃ្មុំ។

៤. រចនាសម្ព័ន្ធ មន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ