នៅព្រឹកថ្ងៃអង្គារ ទី១៨ ខែកុម្ភៈ ឆ្នាំ២០២៥ លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានដឹកនាំមន្រ្តីជំនាញ ចុះពិនិត្យដំណើរការដាំដុះដំណាំម្នាស់របស់ប្រជាកសិករនៅភូមិភ្នំ អំពិលជ្រុំ និងភូមិតាអ៊ុយ ឃុំទន្លេបិទ ស្រុកត្បូងឃ្មុំ។ តាមការចុះជួបផ្ទាល់នៅតាមចម្ការ កសិករបានរៀបរាប់ឲ្យដឹងថា នៅឃុំទន្លេបិទ ស្រុកត្បូងឃ្មុំ ប្រជាកសិករ ៣ភូមិ បានប្តូរពីការដាំដំណាំផ្សេង" មកដាំម្នាស់ដែលមានផ្ទៃដីកើនឡើងជិត ៣០០ហិកតាហើយ ស្ទើរស្មើផ្ទៃដីដាំម្នាស់ទូទាំងខេត្ត។ ដីមួយហិកតា អាចដាំម្នាស់បានចន្លោះពី ៦០ ០០០កូនទៅ៧០ ០០០កូន។ កសិករ បានបន្តទៀតថា បច្ចុប្បន្នម្នាស់ មានទីផ្សារល្អ មិនមានការកកស្ទះនោះទេ រីឯតម្លៃក៏សមរម្យ។ នៅថ្ងៃនេះ ផ្លែម្នាស់លេខ១ អាចលក់បានចន្លោះពី ១២ ០០០រៀល ទៅ១៤ ០០០រៀល/ឡូត៍ លេខ២ ចន្លោះពី ៨ ០០០រៀល ទៅ១០ ០០០រៀល/ឡូត៍។ បើទោះបីជាទីផ្សារម្នាស់មានតម្លៃល្អប្រសើរក៏ដោយ ដើម្បីជៀសវាងការកកស្ទះទីផ្សារម្តងម្កាលនៅវេលាណាមួយជាយថាហេតុនិងរក្សាស្ថិរភាពថ្លៃ ប្រជាកសិករ បានស្នើសុំបង្កើតសហគមន៍កសិកម្មមួយ។ ឆ្លើយតបសំណូមពរនេះ លោកប្រធានមន្ទីរ បានសន្យាថានឹងឲ្យមន្ត្រីជំនាញទាក់ទងផ្ទាល់ជាមួយអាជ្ញាធរ ប្រជាកសិករ ពិនិត្យលទ្ធភាពសម្របសម្រួលរៀបចំសហគមន៍នេះ។
អាជីវករ ពាណិជ្ជករ ត្រូវការទិញដុំ រាយ អាចទាក់ទងទូរស័ព្ទលេខ ០៨៨ ៩ ៥៥៥ ៣៣២,០១២ ៤៩៤ ៣៦៦, ០១២ ៣៨៨ ៩៩៩