នៅព្រឹកថ្ងៃទី១៩ ខែកុម្ភៈ ឆ្នាំ២០២៥ លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានដឹកនាំមន្រ្តីជំនាញ ចុះពិនិត្យការបូមទឹកដោយប្រព័ន្ធសូឡាស្រោចស្រពដំណាំស្រូវប្រាំង របស់កសិករនៅភូមិពន្លៃ ភូំិបុស្សទី ឃុំកក់ ស្រុកពញាក្រែក  ដោយមានការចូលរួមពីលោកមេឃុំ មន្ត្រីកសិកម្មឃុំ និងកសិករ ចំនួន ១២រូប ក្នុងនោះស្រី ១រូប។ ក្នុងឱកាសនោះ ក្រុមការងារបានផ្តល់នូវការណែនាំបន្ថែម ៖
-ចងក្រងជាក្រុមកសិករដែលមានក្បាលដីស្រែក្បែរគ្នា ៤-៥គ្រួសារ ប្រើប្រាស់សូឡាបូមទឹក ១គ្រឿង ដោយដាក់វេនគ្នាបង្ហូរទឹកបញ្ចូលស្រែតែម្តង ដែលធ្វើឲ្យកសិករម្នាក់ៗចំណាយប្រាក់តិចតែចំណេញច្រើន                                                                       -កសិករ ត្រូវសម្រិតសម្រាំងគ្រាប់ពូជស្រូវដោយខ្លួនឯង ដោយរក្សាទុកផ្នែកណាមួយដែលគិតថាល្អ ធ្វើការកាត់ពូជលាយ កាត់ស្មៅ ជម្រុះកួរមិនចោល។ កសិករ អាចរក្សាទុកដី ១០អារ សម្រាប់ព្រោះវិញលើផ្ទៃដី ១ហិកតា
-ជំរុញការផលិតពូជស្រូវដោយខ្លួនឯង ជាពិសេសពូជក្នុងស្រុក
-ប្រមូលផ្តុំដោយស្ម័គ្រចិត្តផ្លាស់ប្តូរមកដាំដុះប្រភេទពូជស្រូវក្រអូបក្នុងស្រុក ដូចជាប្រភេទពូជសែនក្រអូប០១ ដើម្បីភ្ជាប់ទៅកាន់ទីផ្សារ(រោងម៉ាស៊ីនកិនស្រូវក្នុងខេត្ត) តាមកិច្ចសន្យាផលិតកម្មកសិកម្ម ដើម្បីរក្សាស្ថិរភាពថ្លៃនិងនិរន្តរភាពទីផ្សារ
សូមអំពាវនាវដល់បងប្អូនប្រជាកសិករ កុំធ្វើស្រូវរដូវប្រាំងជាថ្មី ចាប់ពីខែកុម្ភៈ ឬខែមិនា ព្រោះនឹងប្រឈមខ្វះទឹក ស្រោចស្រព ហើយក៏គួរពិចារណាកុំប្រញាប់ចាប់ផ្តើមធ្វើស្រូវរដូវវស្សា ប្រភេទស្រូវកណ្តាល និងស្រូវធ្ងន់ នៅ ខែមេសា ដោយត្រូវរង់ចាំ ដល់ខែឧសភា ឬខែមិថុនា ដើម្បីចៀសវាងការខូចខាតគ្រាប់ពូជដោយសារមិនមានភ្លៀង ធ្លាក់គ្រប់គ្រាន់ និងកាត់បន្ថយចំណាយលើការថែទាំ៕