នាថ្ងៃពុធ ១៥កើត ខែមាឃ  ឆ្នាំរោង ឆស័ក ព.ស.២៥៦៨ ត្រូវថ្ងៃទី១២ ខែកុម្ភៈ ឆ្នាំ២០២៥ លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ និងជាប្រធានអង្គភាពអនុវត្តគម្រោងថ្នាក់ខេត្ត បាន ដឹកនាំមន្ត្រីជំនាញចុះពិនិត្យស្ថានភាពចម្ការបង្ហាញដំណាំពោតក្រហមពូជកម្ពុជា០១(CHM 01)ដែលសម្រប សម្រួលនិងតាមដានអនុវត្តផ្ទាល់ដោយមន្ត្រីអនុវត្តគម្រោងខ្សែច្រវាក់ផលិតកម្មដោយ ភាតរៈបរិស្ថាន (CFAVC) នៃមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំដែលជាគម្រោងរបស់រាជរដ្ឋាភិបាលកម្ពុជា គាំទ្រថវិកាពី ហិរញ្ញប្បទានរបស់ធនាគារអភិវឌ្ឍន៍អាស៊ីនិងប្រគល់ធាតុចូលកសិកម្ម(ជី)ដល់កសិករអនុវត្តបង្ហាញ ២០បង្ហាញ/២០គ្រួសារ នៅឃុំជំនីក ឃុំស្វាយឃ្លាំង ឃុំកំពង់ទ្រាស ស្រុកក្រូចឆ្មារ និងឃុំជីរោទិ៍ទី១ ឃុំបឹងព្រួល ស្រុកត្បូងឃ្មុំ  ខេត្តត្បូងឃ្មុំ ដោយមានអ្នកចូលរួម ២៥រូប ក្នុងនោះស្រី ៤រូប។
តាមផែនការ ការធ្វើបង្ហាញត្រូវអនុវត្តលើផ្ទៃដី ០,៥០ហិកតា/បង្ហាញ ដោយប្រើគ្រាប់ពូជពោតអ៊ីប្រ៊ីដកម្ពុជា០១ (Cambodia Hybrid Maize 01-CHM01 ) ដែលជាពូជស្រាវជ្រាវបង្កាត់ដោយអ្នកបច្ចេកទេសកម្ពុជាយើង ហើយបានប្រកាសឲ្យប្រើប្រាស់ ជាផ្លូវការដោយក្រសួងកសិកម្ម រុក្ខាប្រមាញ់ និងនេសាទ។ តាមការពិនិត្យនិងការ រៀបរាប់របស់កសិករអនុវត្តបង្ហាញបញ្ជាក់ថា ពូជពោតមានអាយុកាលខ្លី សមស្របសម្រាប់ដាំរដូវវស្សាដែលត្រូវ ប្រមូលផលមុនទឹកទនលេមកដល់ តែស្នូលដូចជាធំបន្តិច។ ចំពោះទិន្នផល មិនទាន់អាចប៉ាន់ស្មានបាននៅឡើយ។
នាឱកាសនោះ ក្រុមការងារ បានផ្តល់នូវការណែនាំបន្ថែមដល់កសិករដែលទទួលអនុវត្តបង្ហាញដូចជា ៖   
-ការប្រើប្រាស់ជីស្របតាមបច្ចេកទេស ដែលធ្វើឲ្យដើមរឹងមាំការពារដួលរលំ
-កសិករត្រូវពន្យាពិនិត្យពីបរិមាណសារធាតុចិញ្ចឹម NPK នៅលើសំបកបាវមុនសម្រេចទិញយកមកប្រើតាមដំណាក់ កាលលូតលាស់របស់ដំណាំ
-មកចម្ការជាប្រចាំ ពិនិត្យលើវត្តមានសត្វល្អិតចង្រៃ(ដង្កូវហ្វូងប្រភេទថ្មី.) ជំងឺផ្សិតដូន្នីមីលឌូ(Downy mildew ) និងវិធានការកម្ចាត់ 
-កសិករត្រូវធ្វើការកត់ត្រាជាប្រចាំពីពេលវេលាដាំ ការស្រោចស្រព បរិមាណជីត្រូវប្រើ កម្រិតលូតលាស់  ការបំផ្លាញ របស់សត្វល្អិតចង្រៃ ជំងឺ វិធានការគ្រប់គ្រង និងកត់ត្រាអ្វីៗ ដែលបានរកឃើញពេលអនុវត្តបង្ហាញ និងជូនដំណឹង ដល់អ្នកស្រាវជ្រាវបន្ថែម ក្នុងការអភិវឌ្ឍន៍ពូជ ដើម្បីតម្រូវការទីផ្សារ និងប្រកួតប្រជែងប្រជែញជាមួយពូជនាំចូល...។