នាព្រឹកថ្ងៃសុក្រ ១០កើត ខែមាឃ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៧ ខែកុម្ភៈ ឆ្នាំ២០២៥ ឯកឧត្តម វង សូត ព្រមទាំងសមាជិក សមាជិការដ្ឋសភាមណ្ឌលត្បូងឃ្មុំ រួមមានដូចជា ឯកឧត្តម កែវ ពិសិដ្ឋ, ឯកឧត្តម សន សារ៉ាណា, ឯកឧត្តម ម៉ូត យូសុះ, ឯកឧត្តម យិន ប៊ុនណាង, និងលោកជំទាវ សាន្ត អរុណ ធ្វើការពិនិត្យ និងសិក្សាអំពីការបង្កបង្កើនផលដំណាំ នៅសហគមន៍កសិកម្មបៃតងគោកស្រុក ដែលស្ថិតនៅក្នុងភូមិគោកស្រុក ឃុំគោកស្រុក ស្រុកតំបែរ ខេត្តត្បូងឃ្មុំ  បន្ទាប់ពីបញ្ចប់ការសំណេះសំណាលជាមួយសមាជិកភូមិ ឃុំ។
សហគមន៍កសិកម្មបៃតងគោកស្រុក ត្រូវបានបង្កើតឡើងតាំងពីឆ្នាំ២០២០ ដែលមានសមាជិក៦៥គ្រួសា មានផ្ទៃដីដាំដុះសរុប២២១ហិចតា ក្នុងនោះដំណាំបន្លែមាន៦៤ហិចតា។ ដំណាំសំខាន់ជាងគេគឺ ខ្ទឹមស្លឹក ក្រៅពីនោះដំណាំបន្ទាប់បន្សំផ្សេងទៀតមានដូចជា ត្រសក់ ត្រប់ស្រួយ ម្រះ កៅស៊ូ និងស្វាយចន្ទីបន្តិចបន្តួច។ កសិករនៅក្នុងសហគមន៍នេះ និយមដាំខ្ទឹមស្លឹក ដោយសារដំណាំប្រភេទនេះ ងាយស្រួលដាំ មានរយៈពេលដាំដុះត្រឹមតែ១ខែ១០ថ្ងៃ ព្រមទាំងទទួលបានតម្លៃសមរម្យ ដែលជួយកសិករទទួលបានចំណូលខ្ពស់។ 
ក្រោយពីបានពិនិត្យកសិដ្ឋាន និងរបៀបបង្កបង្កើនផលរបស់ប្រជាកសិកររួចមក ឯកឧត្តម វង សូត បានជួបសំណេះសំណាលជាមួយសមាជិកសហគមន៍ទាំង៦៥គ្រួសារ។ ឯកឧត្តម បានស្វែងយល់ពីបញ្ហាប្រឈមនានាចំពោះការដាំដុះ ដែលមានដូចជាកង្វះខាតទឹកក្នុងរដូវប្រាំង និងបញ្ហាសត្វល្អិតខ្លះៗផងដែរ។ សហគមន៍មានស្ថានីយបូមទឹកប្រើប្រាស់ប្រព័ន្ធសូឡា និងប្រព័ន្ធស្រោចស្រព្វចំនួន៣កន្លែង ប៉ុន្តែមិនអាចផ្គត់ផ្គង់ទឹកបានគ្រប់គ្រាន់នៅក្នុងរដូវប្រាំង។
ឯកឧត្តមអនុប្រធានទី២រដ្ឋសភា បានជំរុញប្រធានសហគមន៍ និងមន្ទីកសិកម្ម ព្រមទាំងអង្គភាពដែលពាក់ព័ន្ធទាំងអស់ខិតខំធ្វើយ៉ាងណា ជួយពង្រីកប្រព័ន្ធស្រោចស្រពបន្ថែមទៀត ដើម្បីបំពេញតម្រូវការទឹកនៅក្នុងរដូវប្រាំង និងបានណែនាំមន្ត្រីកសិកម្មឃុំ ត្រូវជួយគាំទ្របច្ចេកទេសដាំដុះដល់កសិករ។
ឯកឧត្តម ក៏បានលើកទឹកចិត្តដល់ប្រធានសហគមន៍ និងក្រុមប្រឹក្សាសហគមន៍ ឱ្យខិតខំស្វែងរកទីផ្សារសម្រាប់កសិផល និងធ្វើផែនការផលិតឱ្យបានច្បាស់លាស់ ដោយនាំយកកសិផលរបស់កសិករ ទៅដល់ទីផ្សារគោលដៅចុងក្រោយ ដើម្បីបង្កើនប្រាក់ចំនេញ និងរក្សាបាននិរន្តរភាពទីផ្សារ ស្របពេលនោះក៏ត្រូវពង្រីកការដាំដុះដំណាំសក្តានុពលផ្សេងៗទៀតដើម្បីផ្គត់ផ្គង់ទីផ្សារផងដែរ។
ចុងក្រោយ ឯកឧត្តម វង សូត ព្រមទាំងឯកឧត្តម លោកជំទាវ តំណាងរាស្រ្តមណ្ឌលត្បូងឃ្មុំ បានលើកទឹកចិត្តដល់បងប្អូនកសិករ ដែលជាសមាជិកសហគមន៍ បន្តបង្ករបង្កើនផលតាមបច្ចេកទេសរបស់សហគមន៍ និងរក្សាបាននូវសាមគ្គីភាពក្នុងសហគមន៍ និងបានឧបត្ថម្ភថវិកា៥ម៉ឺនរៀល ក្នុងមួយគ្រួសារ។