ព្រឹកថ្ងៃព្រហស្បតិ៍ ទី១៦ ខែមករា ឆ្នាំ២០២៥ ឯកឧត្តម មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជួបសំណេះសំណាលមន្ត្រីរាជការមន្ចុីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ ដោយមានការអញ្ជើញចូលរួមពីឯកឧត្តម គន់ រ័ត្នមុនី អភិបាលរងនៃគណៈអភិបាលខេត្តត្បូងឃ្មុំ ឯកឧត្តម ចាន់ សុវត្ថិភាព អនុរដ្ឋលេខាធិការនិងឯកឧត្តម អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។ 
តាមរបាយការណ៍របស់លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានឲ្យដឹងថា នៅឆ្នាំ២០២៤ ខេត្តត្បូងឃ្មុំ មានផ្ទៃដីផលិតកម្មដំណាំប្រមាណ ៩០ ៦៣០ហិកតា កៅស៊ូប្រមាណ ៨១ ៩១៤ហិកតា ការចិញ្ចឹមសត្វមានការផុលផុសជាលក្ខណៈកសិដ្ឋានដែលមានប្រមាណ ១ ៣១១ ៨៤៥ក្បាល/ឆ្នាំ ដែលផ្តល់ផលកសិកម្មសរុបប្រមាណ ១ ៧៣៣ ២០០តោន/ឆ្នាំ មានតម្លៃប្រមាណ ៦៩១លានដុល្លារអាមេរិក/ឆ្នាំ។ ទន្ទឹមសមិទ្ធផលសម្រេចបាននេះ មន្ទីរ ជួបនូវបញ្ហាប្រឈមមួយចំនួន ដែលបញ្ហាខ្លះ អាចដោះស្រាយបានដោយមន្ទីរផ្ទាល់ បញ្ហាខ្លះ ទាមទារអន្តរស្ថាប័ន ពិភាក្សាដោះស្រាយ។
មានប្រសាសន៍សំណេះសំណាល ឯកឧត្តម មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានសំដែងនូវការអបអរសាទរចំពោះសមិទ្ធផលសម្រេចបាន ហើយត្រូវប្រឹងប្រែងពង្រឹងពង្រីកបន្ថែមទៀត ព្រោះថារាជរដ្ឋាភិបាលកម្ពុជា នៅតែកំណត់ កសិកម្មជាវិស័យអាទិភាព ដែលបានជួយរក្សាសន្តិសុខស្បៀងផង ជាចំណូលរបស់គ្រួសារកសិករផង បង្កើតការងារផង និងគាំទ្រដល់ចរន្តសេដ្ឋកិច្ចជាតិផងដែរ។ រាជរដ្ឋាភិបាលកម្ពុជា នីតិកាលទី៧នៃរដ្ឋសភា បានដាក់ចេញនូវកម្មវិធីគោលនយោបាយសម្រាប់វិស័យកសិកម្មទី៥និងទី៦ សំដៅលើកកម្ពស់ផលិតភាពកសិកម្ម ពង្រឹងគុណភាពកសិផល ស្ថេរភាពថ្លៃ និងនិរន្តរភាពទីផ្សារ តាមរយៈការបង្កើតសហគមន៍កសិកម្មទំនើប ការដាក់មន្ត្រីកសិកម្មឃុំ គ្រប់ឃុំ ព្រមទាំងផ្តល់ហិរញ្ញប្បទាន ១០០លានដុល្លារសម្រាប់គាំទ្រដល់សហគមន៍កសិកម្ម។ ដូច្នេះ រាល់ការលើកផែនការសកម្មភាពរបស់មន្ទីរ ត្រូវឆ្លើយតបទៅនឹងកម្មវិធីគោលនយោបាយនេះ ហើយត្រូវមានភាពបត់បែន រស់រវើក ស្របទៅតាមស្ថានភាពជាក់ស្តែងផងដែរ។ ពាក់ព័ន្ធព្រឹត្តិការណ៍ថ្មីៗនេះ ដែលមានការផ្សព្វផ្សាយអំពីតម្លៃស្រូវធ្លាក់ចុះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានចុះពិនិត្យ ក្តាប់សភាពការណ៍ដោយផ្ទាល់ បានរកឃើញនូវអំពើទុច្ចរិតមួយចំនួនក្នុងបំណងឲ្យមានការចលាចលសង្គម ជាពិសេសចង់វាយប្រហារដល់រាជរដ្ឋាភិបាល។ យើងពិនិត្យឃើញតម្លៃស្រូវបានធ្លាក់ចុះបន្តិច បើធៀបឆ្នាំ២០២៣។ ​បើធ្វើការស្រាវជ្រាវគឺជាការធ្លាក់ចុះជាលក្ខណៈអន្តរជាតិ ដោយសារប្រទេសឥណ្ឌា ដែលផលិតស្រូវច្រើនជាងគេ បានបញ្ចេញអង្ករពីឃ្លាំងរបស់ខ្លួនលក់ទៅកាន់បណ្តាប្រទេសនានា ដែលនៅឆ្នាំ២០២៣ បានហាមមិនឲ្យបញ្ចេញលក់នោះទេ ក្រែងខ្វះស្បៀងសម្រាប់ប្រជាជនឥណ្ឌា។ ហេតុនេះហើយ បានប៉ះពាល់ដល់ការបញ្ចេញអង្ករលក់ទៅក្រៅប្រទេសរបស់ប្រទេសវៀតណាមនិងថៃ។ ដូច្នេះ ក៏ធ្វើឲ្យការបញ្ជាទិញស្រូវរបស់ប្រទេសវៀតណាម ថយចុះ បណ្តាលឲ្យប៉ះពាល់ដល់ការបញ្ជាទិញស្រូវពីកម្ពុជា ជាពិសេសស្រូវពូជOM។ ហេតុនេះហើយ បានជាតម្លៃស្រូវពូជOM មានការធ្លាក់ចុះ ទន្ទឹមនឹងផ្ទៃដីស្រូវរដូវប្រាំងឆ្នាំនេះ កើនឡើងទ្វេរដង។ ដោយឡែកពូជស្រូវក្រអូបក្នុងស្រុក មិនមានការធ្លាក់ថ្លៃនោះទេ។ ព្រឹត្តិការណ៍ នេះ ទាមទារឲ្យមន្ត្រីយើង បានស្វែងយល់ឲ្យច្បាស់ ហើយហ៊ានបកស្រាយជូនដល់ប្រជាកសិករ សាធារណជនឲ្យបានយល់។ ជាមួយគ្នានេះ ឯកឧត្តមរដ្ឋលេខាធិការ បានពាំនាំប្រសាសន៍ឯកឧត្តមរដ្ឋមន្ត្រី ស្នើឲ្យកសិកររបស់យើងបង្វែរមកប្រើប្រាស់ពូជស្រូវក្រអូបក្នុងស្រុក ដែលមានទីផ្សារក្នុងស្រុកស្រាប់ គឺបណ្តារោងម៉ាស៊ីនកិនស្រូវសម្រាប់នាំចេញ ដែលជាអ្នកទិញច្បាស់លាស់ ព្រមទាំងផ្តល់ឱកាសដល់រាជរដ្ឋាភិបាល ងាយដាក់ចេញយន្តការអន្តរាគមន៍ ពេលមានវិបត្តិម្តងៗ។ ទន្ទឹមនេះ ត្រូវពង្រឹងសហគមន៍កសិកម្មដែលមានស្រាប់ ឬ ជំរុញការផ្សព្វផ្សាយដល់ប្រជាកសិករ ចងក្រងជាសហគមន៍កសិកម្មទំនើប ដើម្បីប្រមូលផ្តុំកម្លាំងផលិត ទាំងបរិមាណនិងគុណភាព ដែលអាចកាត់បន្ថយថ្លៃដើមផលិត ហើយភ្ជាប់ទៅកាន់ទីផ្សារតាមយន្តការផលិតកម្មកសិកម្មតាមកិច្ចសន្យា។