បន្ទាប់ពីចូលរួមកម្មវិធីកាក បាទក្រហម " ទិវាអន្តរជាតិអ្នកស្ម័គ្រចិត្ត ៥ ធ្នូ " លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានបន្តចុះពិនិត្យការប្រមូលផលដំឡូងមីរបស់កសិករនៅភូមិស្មោញ ឃុំល្ងៀង ស្រុកត្បូងឃ្មុំ ខេត្តត្បូងឃ្មុំ។ កសិករ ណូត ធន់ ដាំដំឡូងមីពូជ ៨១ លើផ្ទៃដី ១ហិកតា ប្រមូលផលដំឡូងបានប្រមាណ ៣០តោន ដោយគាត់បានអនុវត្តត្រឹមត្រូវតាមបង្គុំបច្ចេកទេសកសិកម្ម ដែលផ្តល់ជូនពីមន្ត្រីជំនាញនៃមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ។ កសិករ ណូត ធន់ បានរៀបរាប់ដោយមោទនភាពថា ឆ្នាំនេះ គាត់នឹងទទួលបានចំណេញ ទោះតម្លៃដំឡូងមីធ្លាក់ចុះបន្តិចមែន ព្រោះទិន្នផលដំឡូងមីគាត់ អាចបាន ៣០តោន/ហិកតា។ ផលនេះ គឺបានមកពីគាត់ បានចូលរួមអនុវត្តតាមបច្ចេកទេសរបស់មន្ត្រីជំនាញមន្ទីរកសិកម្ម។ ដើម្បីបានចំណេញកាន់តែខ្ពស់ គាត់នឹងនាំដំឡូងមីនេះ ទៅលក់នៅប្រទេសវៀតណាមផ្ទាល់តែម្តង។ តាមព័ត៌មានតម្លៃក្នុងស្រុក ២៩០រៀល/គក្រ ហើយនៅវៀតណាម ៣៥០រៀល/គក្រ។ កសិករ ណូត ធន់ បាននិយាយទៀតថា ចំណេញ មិនមែលផ្តោតលើតម្លៃតែ មួយមុខនោះទេ ការអនុវត្តតាមបង្គុំបច្ចេកទេស ហើយទទួលបានទិន្នផលខ្ពស់ នោះនឹងអាចបានចំណេញហើយ បើតម្លៃកាន់តែប្រសើរនោះ ចំណេញក៏កាន់តែខ្ពស់តាមនោះដែរ។