ព្រឹកថ្ងៃអង្គារ ១១កើត ខែអាសាឍ ពុទ្ធសករាជ ២៥៦៨ ត្រូវនឹងថ្ងៃទី១៦ ខែកក្កដា ឆ្នាំ២០២៤ លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ និងសហការី បានចុះពិនិត្យវឌ្ឍនភាពនៃការធ្វើបង្ហាញដំឡូងមី ដោយប្រើពូជសុទ្ធនិងអនុវត្តបង្គុំបច្ចេកទេសត្រឹមត្រូវ ព្រមទាំងប្រគល់ធាតុចូលកសិកម្ម(ជីកសិកម្ម15-15-15 )បន្ថែម ដល់កសិករអនុវត្តបង្ហាញពីផលិតកម្មពូជដំណាំដំឡូងមី ៦បង្ហាញ/៦គ្រួសារ នៅឃុំល្ងៀង ស្រុកត្បូងឃ្មុំ ឃុំគោកស្រុក ស្រុកតំបែរ ដែលសម្របសម្រួលនិងតាមដានអនុវត្តផ្ទាល់ដោយមន្ត្រីអនុវត្តគម្រោងខ្សែច្រវាក់ផលិតកម្មដោយ ភាតរៈបរិស្ថាន (CFAVC) នៃមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ ដោយមានអ្នកចូលរួម ៩នាក់ ស្រី ៣នាក់។
ការធ្វើបង្ហាញផលិតកម្មពូជដំណាំដំឡូងមី ក្នុងគោលបំណង ៖
១.ជំរុញឲ្យកសិករផលិតពូជល្អសម្រាប់ខ្លួនឯង និងផ្សព្វផ្សាយចែកចាយបន្តដល់កសិករ ក្នុងសហគមន៍និងតំបន់ខ្លួនឯង។
២.ផ្តល់ពូជដំឡូងមីដែលមានគុណភាពល្អ ធន់នឹងជំងឺ ទទួលទិន្នផលខ្ពស់ ហើយធន់នឹង ការប្រែប្រួលអាកាសធាតុ
៣.ចូលរួមចំណែកយ៉ាងសំខាន់ក្នុងការពង្រឹងប្រព័ន្ធផលិតកម្ម និងការផ្គត់ផ្គង់ពូជដំឡូងមី ប្រកបដោយនិរន្តរភាព។
នាឱកាសនោះ ក្រុមការងារ បានផ្តល់នូវការណែនាំបន្ថែមដល់ កសិករដែលទទួលអនុវត្តបង្ហាញ ដូចជា៖
-ត្រូវចុះពិនិត្យចម្ការជាប្រចាំ ដោយអនុវត្តការកាត់សម្អាតដើមដំឡូងមីដែលកើតជំងឺម៉ូសាអ៊ិក (CMD) ចេញពីចម្ការបង្ហាញនិងដុតចោល។ -អនុវត្តការប្រើប្រាស់ជីស្របតាមបច្ចេកទេស ដោយជីកប់ទៅក្នុងដីតាមចន្លោះគុម្ពឲ្យបានត្រឹមត្រូវ និងរក្សាដើមទុក ២ដើមក្នុងគុម្ព
-កសិករ ត្រូវធ្វើការប្រមូផលពូជដំឡូងមី បន្ទាប់ពីដាំបាន ៨ខែឡើង ឬនៅខែមីនា-មេសា ទើបទទួលបានទិន្នផលខ្ពស់ និងសម្រាប់ទុកដើមដំឡូងជាដើមពូជ ដើម្បីពង្រីកការដាំដុះបន្តរក្សាភាពសុទ្ធ និងចែកចាយដល់កសិករដទៃទៀត។ -ណែនាំឲ្យសហគមន៍កសិកម្ម ធ្វើដំឡូងមីក្រៀមស្តុកក្នុងឃ្លាំងសហគមន៍ និងធ្វើកិច្ចសន្យាទិញលក់ ជាមួយសិប្បកម្មកែច្នៃម្សៅដំឡូងមី ឬក្រុមហ៊ុនផលិតចំណីសត្វ។
