នៅថ្ងៃទី៨ ខែកុម្ភៈ ឆ្នាំ២០២៤ លោក យូ តាំងហ៊ី អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានដឹកនាំ លោក សោម ឧត្តម មន្ដ្រីការិយាល័យក្សេត្រសាស្ត្រ និងផលិតភាពកសិកម្ម និងមានការចូលរួមពីលោក អភិបាលរងស្រុកអូររាំងឪ និងសហការី លោកប្រធានការិយាល័យកសិកម្ម ធនធានធម្មជាតិ និងបរិស្ថាន ស្រុកអូររាំងឪ អាជ្ញាធរឃុំ ភូមិ និងប្រជាពលរដ្ឋ ប្រមាណ ១៧រូប ក្នុងនោះស្រី ០រូប បានចុះពិនិត្យស្ថានភាពដំណាំស្រូវរដូវប្រាំងនៅទីតាំង ភូមិចំការគរ និងភូមិដើមចង្ក្រាន ឃុំចក ចំនួន២២ ហិកតា ស្ថិតនៅដំណាក់កាលផើម និងដាក់ទឹកដោះ ២១ហិកតា និងដំណាក់កាលលូតលាស់១ហិកតា ដែលត្រូវប្រើប្រាស់ទឹកស្រះបុសសូរ។ ស្រះបុសសូរទឹកមានជម្រៅរាក់អាចនឹងរីងនៅពេលកសិករធ្វើការបូបដាក់ស្រែដើម្បីជួយសង្គ្រោះស្រូវ។ តាមការវាយតម្លៃពីមន្ដ្រីជំនាញ មន្ទីរកសិកម្ម រុក្ខាប្រមាញ់ និងនេសាទខេត្ត មន្ដ្រីជំនាញកសិកម្ម ធនធានធម្មជាតិ និងបរិស្ថានស្រុក និងមានការចូលរួមពីអាជ្ញាធរមូលដ្នានស្រុក ឃុំ ភូមិ និងប្រជាពលរដ្ឋ បានវាយតម្លៃថា ស្រែប្រាំងចំនួន ២២ហិកតា នៅឃុំចក ស្ថិតក្នុងដំណាក់កាលផើម និង ដាក់ទឹកដោះ ត្រូវបញ្ចូលទឹកចំនួន១ទៅ៣ដងទៀត ដោយប្រើប្រាស់ទឹកស្រះបុសសូរ។ ក្រុមការងារបានបន្តចុះពិនិត្យស្ថានភាពដំណាំស្រូវរដូវប្រាំងនៅទីតាំង ភូមិបាស្រី ព្រះធាតុថ្មដា ព្រះធាតុកណ្ដាល ថ្នល់កែង និងភូមិត្រពាំងនាង ឃុំព្រះធាតុ ចំនួន ១២៤ ហិកតា ស្ថិតនៅដំណាក់កាលផើម និងចេញកូរចេញផ្កា។  តាមការរាយការណ៍របស់លោកប្រធានការិយាល័យកសិកម្ម ធនធានធម្មជាតិ និងបរិស្ថានបង្ហាញថា ស្រូវនៅទីតាំងទាំងនេះឆ្នាំមុនបានដាំដុះ១លើក ឆ្នាំនេះកសិករឃើញថានៅមានទឹកក្នុងបឹង ទឹកអណ្ដូង និងស្រូវមានតម្លៃថ្លៃកសិករបានដាំដុះ២លើក។  លោកមេឃុំបានបញ្ជាក់ទៀតថាឆ្នាំនេះមិនមានភ្លៀងកក់ខែបណ្ដាលឲ្យអណ្ដូងដែលកសិករជីកសម្រាប់ស្រោចស្រពបានរីង ដែលធ្វើឲ្យផ្ទៃដីស្រូវប្រាំងចំនួន១២៤ហិកតា ប្រឈមនឹងការខ្វះទឹកស្រោចស្រព។  តាមការចុះពិនិត្យទៅលើប្រភពទឹកសម្រាប់ជួយសង្រ្គោះឃើញថាមានប្រភពទឹកបឹងក្រពិត។ ដោយទីទាំងដីស្រែមិនមានអាងឬស្រះសម្រាប់ស្តុបទឹក ដូចនេះត្រូវជីកស្ដារប្រឡាយដោយតភ្ជាប់ពីបឹងកំពិតមកដីស្រែកសិករដោយមានប្រវែងប្រមាណ ២ ២០០ម៉ែត្រ ដោយជីកស្ដារទទឹង ២ម៉ែត្រ ជម្រៅ ២ម៉ែត្រ និងជ្រៅជាងនេះនៅតំបន់ទួល ដែលត្រូវចំណាយអស់រយៈពេល ៣៥ម៉ោង(តាមការរាយការណ៍របស់លោកមេឃុំ)។ ចំពោះបញ្ហានេះ ឯកឧត្ដមបណ្ឌិតអភិបាលខេត្តបានផ្ដល់ជាថវិកាសម្រាប់ស្ដារប្រឡាយចំនួន ១០ម៉ោង ឯកឧត្ដម ម៉ៅ ឌុង អភិបាលរងខេត្តបានផ្ដល់ថវិកាសម្រាប់ស្ដារប្រឡាយចំនួន ១០ម៉ោង  ដែលបានកំពុងបូបទឹកជួយសង្គ្រោះស្រូវបាន ចំនួន ៥០ហិកតា និងលោកមន្ទីរធនធានទឹក និងឧតុនិយម បានផ្ដល់ថវិកាសម្រាប់ស្ដារប្រឡាយចំនួន ៦ម៉ោង នៅខ្វះចំនួន ៩ម៉ោងបន្ថែមទៀត។ តាមរយៈមន្ដ្រីមន្ទីរកសិកម្ម រុក្ខាប្រមាញ់ និងនេសាទចុះពិនិត្យស្ថានភាពស្រូវនេះ លោកមេឃុំព្រះធាតុស្នើសុំឲ្យលោកប្រធានមន្ទីរកសិកម្ម រុក្ខាប្រមាញ់ និងនេសាទជួយឧបត្ថម្ភគាំទ្រក្នុងការស្ដារប្រឡាយជួយសង្រ្គោះស្រូវប្រជាកសិករដែលកំពុងប្រឈមនឹងការខ្វះទឹកស្រោចស្រពនេះទៅតាមលទ្ធភាពជាក់ស្ដែង។