នាថ្ងៃចន្ទ ៥កើត ខែបុស្ស ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៥ ខែ មករា ឆ្នាំ២០២៤ លោកប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានដឹកនាំសហការីចុះ
 ពិនិត្យការបូមទឹកអន្តរាគមន៍ស្រោចស្រពស្រូវរដូវប្រាំងកំពុងខ្វះខាតទឹកនៅភូមិទួកកែវ ឃុំបឹងព្រួល ស្រុកត្បូងឃ្មុំ
តម្លៃស្រូវល្អប្រសើរឆ្នាំនេះជំរុញឲ្យកសិករពង្រីកផ្ទៃដីដាំដុះ គួបផ្សំគ្មានភ្លៀងក់ខែ រដូវរំហើយអូសបន្លាយរយៈពេលយូរ អាកាសធាតុក្តៅខ្លាំង បណ្តាលឲ្យស្រូវរដូវប្រាំងរបស់ប្រជាកសិករមួយចំនួនក្នុងឃុំបឹងព្រួល ស្រុកត្បូងឃ្មុំ និងឃុំទ្រា ឃុំក្រូចឆ្មារ ស្រុកក្រូចឆ្មារ ប្រមាណជាង ៣០០ហិកតា ទាមទារការបូមអន្តរាគមន៍បន្ទាន់។
សូមជម្រាបជូនថា ការធ្វើស្រូវរដូវប្រាំង ត្រូវការទឹកពី ៤០០០~៥០០០ម៉ែត្រត្រីគុណក្នុងមួយហិកតា។ ដូច្នេះ មុនសម្រេចចិត្តធ្វើស្រូវរដូវប្រាំង សូមកសិករ វាយតម្លៃប្រភពទឹកជាមុន ហើយកសិករក្បែរប្រភពទឹក មានជម្រើសមុនគេក្នុងការដាំដុះ អ្នកមានដីស្រែនៅឆ្ងាយ ត្រូវពិចារណាឲ្យបានល្អិតល្អន់ ព្រោះការបូមទឹកឆ្ងាយ ត្រូវចំណាយលើថ្លៃដើមច្រើន។
សង្ឃឹមថា ស្រូវនៅឃុំទាំងពីរ ទទួលបានទឹកគ្រប់គ្រាន់ ស្រូវទទួលបានទិន្នផលខ្ពស់ ទទួលបានចំណូលកាន់តែច្រើន។
ការបូមទឹកអន្តរាគមន៍នេះ មិនមែនសម្រាប់តែស្រូវនោះទេ តែដើម្បីជួយដល់ដំណាំពោតនិងថ្នាំជក់ផងដែរ។