នាថ្ងៃសុក្រ ២កើត ខែបុស្ស ឆ្នាំថោះ ​បញ្ចស័ក ព.ស.២៥៦៧ ត្រូវនឹងថ្ងៃទី១២ ខែមករា ឆ្នាំ២០២៤ លោកប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានដឹកនាំសហការីចុះជួបសំណេះសំណាល និងដកស្រង់បទពិសោធន៍ដាំខ្ទឹមបារាំងរបស់កសិករខេត្តបន្ទាយមានជ័យ។
គ្រួសារកសិករ ម៉ាន់ ម៉ន និងប្រពន្ធ ឈួន ទុំ ទូរស័ព្ទលេខ ០១២ ២៧៦ ១៨២ រស់នៅភូមិពង្រ សង្កាត់កំពង់ស្វាយ ក្រុងសេរីសោភ័ណ ខេត្តបន្ទាយមានជ័យ  កំពុងដាំដុះលើផ្ទៃដីជាង ០,៤ហត ដោយពេលនេះ គាត់កំពុងដាំខ្ទឹម ៣ប្រភេទ រួមមាន ខ្ទឹមបារាំង សាច់ស ខ្ទឹមបារាំង សាច់ក្រហម និងខ្ទឹមកំពិសក្រហម(ចង្កោម) ដែលមកដល់ពេលនេះ មានអាយុ ជាង២ខែមកហើយ ហើយគ្រោងប្រមូលផលចាប់ពីចុងខែកុម្ភៈខាងមុខនេះ(ខ្ទឹមមានអាយុកាល ៤ខែ)។ 
កសិករប្តីប្រពន្ធរូបនេះ​បានរៀបរាប់ថា គាត់មានបទពិសោធន៍ដាំខ្ទឹមបារាំង រយៈពេលជាង ១០ឆ្នាំ។ ការដាំដុះរបស់គាត់ អនុវត្តតាមគោលការណ៍សុវត្ថិភាព។ ដោយបញ្ហាអាកាសធាតុ គាត់អាចដាំបានតែដើមរដូវប្រាំងប៉ុណ្ណោះ ព្រោះខ្ទឹមនេះ ដូចជាទាមទារអាកាសធាតុត្រជាក់ប៉ុណ្ណោះ។ ទន្ទឹមនេះ ការដាំដុះរបស់គាត់ប្រឈមបញ្ហាមួយចំនួនដែលជយនកាលធ្វើឲ្យខ្ទឹមរបស់គាត់ខូច ដូចជាដង្កូវ អាកាសធាតុប្រែប្រួល ភ្លៀងពេក ឬក្តៅពេក។ ម៉្យាងទៀតតម្លៃគ្រាប់ពូជថ្លៃ ព្រមទាំងទាមទារកក់លុយមុន និងទីផ្សារមិនទាន់ទូលំទូលាយ មិនសូវមានគេស្គាល់ពីកសិផលរបស់យើង ដែលធ្វើឲ្យការទទួលបានប្រាក់ចំណេញទាប។
ជាការតម្រង់ទិស គាត់គួរតែដាំខ្ទឹមស្លឹកបន្ថែម នៅផ្នែកណាមួយនៃផ្ទៃដីដាំដុះ ព្រោះមានអាយុកាលខ្លី អាចបង្កើតចំណូលក្នុងវដ្តផលិតកម្មខ្ទឹមបារាំង ដោះស្រាយបន្ទុកចំណាយក្នុងផលិតកម្មខ្ទឹមបារាំងបានមួយចំនួន។