ព្រឹកថ្ងៃព្រហស្បត៍ ទី១៦ ខែវិច្ឆិកា ឆ្នាំ២០២៣ ឯកឧត្តម ម៉ៅ រិទ្ធីថា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចុះពិនិត្យស្រែបង្ហាញផលិតកម្មពូជស្រូវផ្ការំដួល អនុវត្តដោយគម្រោងខ្សែច្រវាក់ផលិតកម្មដោយភាតរបរិស្ថាននៃមន្ទីរកសិកម្ម រុក្ខាប្រមាញ់ និងនេសាទនៅភូមិកំពូលសេរី ឃុំមៀន ស្រុកអូររាំងឪ និងជួបសំណេះសំណាលកសិករសមាជិកសហគមន៍កសិកម្មសាមគ្គីឃុំមៀនប្រមាណ ៥០នាក់ ដោយមានការចូលរួមពីលោកអភិបាល អភិបាលរងស្រុកអូររាំងឪ មេឃុំ មេភូមិ និងកម្លាំងទាំងបី។
ឯកឧត្តម បានកោតសរសើរដល់បងស្រី ជាកសិករធ្វើបង្ហាញដែលយកចិត្តទុកដាក់អនុវត្តតាមបង្គុំបច្ចេកទេសកសិកម្មរហូតទទួលបានស្រូវល្អប្រសើរ ដែលជាពូជសុទ្ធសម្រាប់យកទៅធ្វើពូជបន្ត។ បច្ចុប្បន្នក្រសួងកសិកម្ម រុក្ខាប្រមាញ់ និងនេសាទ បានដាក់ចេញនូវយន្តការជំរុញការផ្សព្វផ្សាយការប្រើពូជសុទ្ធ ដើម្បីជាប្រយោជន៍ ទទួលបានទិន្នផលខ្ពស់ ស្រូវសុទ្ធទទួលបានតម្លៃល្អ បង្កើនចំណូលកសិករ។ ដូច្នេះ សូមកសិករយើង ពង្រីកផ្ទៃដីផលិតពូជឲ្យបានច្រើនជៀសវាងការប្រើពូជរក្សាទុកជាច្រើនជំនាន់ ឬ ពូជទិញមកប្រើដែលមិនដឹងប្រភពច្បាស់លាស់។ ទន្ទឹមនេះឯកឧត្តម បានណែនាំដល់សហគមន៍កសិកម្ម ពង្រឹងរចនាសម្ព័ន្ធគ្រប់គ្រងឲ្យបានរឹងមាំ មានផែនការអាជីវកម្មត្រឹមត្រូវ មានការកត់ត្រាច្បាស់លាស់ ក្លាយជាសហគ្រិនដៃគូជាមួយវិស័យឯកជនក្នុងការទិញលក់កសិផល ធាតុចូលកសិកម្ម និងមានឱកាសខ្ពស់ក្នុងការទទួលបានប្រាក់កម្ចីសម្បទានរបស់រាជរដ្ឋាភិបាល ដែលមានអត្រាការប្រាក់ទាប យកមកប្រើប្រាស់ក្នុងខ្សែច្រវាក់ផលិតកម្មរបស់ខ្លួននិងអត្ថប្រយោជន៍ផ្សេងៗទៀតពីគម្រោងនានារបស់រាជរដ្ឋាភិបាលកម្ពុជា។