ព្រឹកថ្ងៃចន្ទ ១កើត ខែកត្តិក ពុទ្ធសករាជ ២៥៦៧ ត្រូវនឹងថ្ងៃទី១៣ ខែវិច្ឆិកា ឆ្នាំ២០២៣ លោកប្រធានមន្ទីរ បានដឹកនាំមន្ត្រីជំនាញចូលរួមជាមួយមន្ទីរធនធានទឹកនិងឧតុនិយម  រដ្ឋបាលស្រុកត្បូងឃ្មុំ រដ្ឋបាលឃុំជីរោទ៍ទី២ ឃុំបឹងព្រួល និងអង្គភាពពាក់ព័ន្ធ ជួបប្រជុំពិភាក្សាកំណត់ការប្រើប្រាស់ទឹកនៅក្នុងទំនប់បឹងក្រចាប់ ដែលមានប្រជាពលរដ្ឋចូលរួមប្រមាណ ១០០នាក់ ក្នុងសាលាឆាន់វត្តទួលវិហារ។
តាមការបញ្ជាក់ពីលោកប្រធានមន្ទីរធនធានទឹកនិងឧតុនិយម ទំនប់បឹងក្រចាប់ មានទីតាំងស្ថិតនៅភូមិបឹងត្រស់ ឃុំជីរោទ៍ទី២ ស្រុកត្បូងឃ្មុំ ខេត្តត្បូងឃ្មុំ ដែលមានទំហំ ៦៣៥ហិកតា មានខ្នងទំនប់ប្រវែង ៥ ៩០០ម ដែលទើបបានបញ្ចប់ការសាងសង់ជួសជុលកែលម្អក្នុងឆ្នាំ២០២៣ មានធារទឹកប្រមាណ ២៥លានម៉ែត្រគីប។
តំណាងប្រជាពលរដ្ឋមានដីអាស្រ័យផលនៅជុំផ្នែកខាងលើទំនប់បឹងក្រចាប់ បានលើកឡើងថា បន្ទាប់ពីការជួសជុលកែលម្អប្រព័ន្ធអាងទឹករួច ធ្វើឲ្យផ្ទៃដីប្រមាណ ៧០០ហិកតា ត្រូវបានទឹកលិចមិនអាចធ្វើស្រែប្រាំងបានគិតត្រឹមដើមខែវិច្ឆិកានេះ ដោយសារទំនប់បង្ហៀរទឹក មានកម្រិតខ្ពស់ និងបានសំណូមពរសុំធ្វើការបើកទ្វារទឹកបង្ហូរចេញត្រឹមក្រោមទ្វារទឹកឲ្យដូចកាលពីមិនទាន់ជួសជុល ដើម្បីឲ្យទឹកស្រកគាត់អាចធ្វើការដាំដុះស្រូវបានដើមខែនេះ។
បន្ទាប់ពីពិភាក្សាជាមួយរួច ក្រុមការងារបានឆ្លើយតបថា នឹងធ្វើការបើកទ្វារទឹកបង្ហូរទឹកចេញទុកត្រឹម១កាំ ហើយនឹងបន្តចុះពិនិត្យមើលជាក់ស្តែងនៅទីតាំងទំនប់ ដើម្បីមើលលទ្ធភាពទឹកស្តុកទុកសម្រាប់ស្រោច ជៀសវាងការបង្ហូរទឹកអស់ដែលធ្វើឲ្យខ្វះទឹកស្រោចស្រពនៅពេលខាងមុខ។
បន្ទាប់មកមន្ត្រីជំនាញបានបង្ហាញ ៖
+បច្ចេកទេសរៀបចំដីស្រែ 
-ត្រូវភ្ជួររាស់២-៣ដង
-ត្រូវរៀបចំស្រែបានធំ ដើម្បីងាយស្រួលប្រើប្រាស់គ្រឿងយន្តកសិកម្ម ដូចជាត្រាក់ទ័រ និងម៉ាស៊ីនច្រូត
-ត្រូវរៀបចំភ្លឺស្រែឲ្យបានធំមាំដើម្បីរក្សាទឹក
-ត្រូវកៀរពង្រាបដីស្រែឲ្យបានរាបស្មើ
+ការដាំដុះស្រូវ
-ការជ្រើសរើសពូជដែលមានប្រភពច្បាស់លាស់ ពូជសុទ្ធល្អ ពូជមានតម្រូវការទីផ្សារ
-ការដាំដុះ ការថែទាំ និងការប្រើប្រាស់ជីនិងថ្នាំ។
+ផ្នែកជលផល
-ណែនាំប្រជាពលរដ្ឋសូមកុំនេសាទដោយប្រើប្រាស់ឧបករណ៍ខុសច្បាប់     
- សូមកុំកាប់ទន្ទ្រានដីព្រៃលិចទឹកដែលជាជម្រកត្រីពង
-ត្រូវរាយការណ៍ពីការប្រើឧបករណ៍នេសាទខុសច្បាប់ និងការទន្ទ្រានយកដីព្រៃលិចទឹក ទៅអាជ្ញាធរភូមិ ប៉ុស្ត៍នគរបាលរដ្ឋបាល រដ្ឋបាលឃុំ ស្រុក ឬមន្ទីរ ដើម្បីចងក្រងសំណុំរឿងចាត់វិធានការទៅតាមផ្លូវច្បាប់។                                                                  
ក្នុងឱកាសនោះ លោកប្រធានមន្ទីរ បានសំណូមដល់ប្រជាពលរដ្ឋដែលបានចូលរួម ឲ្យបង្កើតជាសហគមន៍ប្រើប្រាស់ទឹក សហគមន៍កសិកម្មកសិកម្ម ដើម្បីងាយស្រួលការគ្រប់គ្រងប្រើប្រាស់ទឹកឲ្យមានប្រសិទ្ធភាពនិងទទួលការបណ្តុះបណ្តាលពីបង្គុំបច្ចេកទេសកសិកម្មត្រឹមត្រូវ។
បើមានតម្រូវការបច្ចេកទេស សូមលើកសំណើរមកមន្ទីរ ដើម្បីចាត់មន្ត្រីជំនាញចុះបណ្តុះបណ្តាល។