កម្មវិធីទី២ រសៀលថ្ងៃពុធ ទី០៨ ខែវិច្ឆិកា ឆ្នាំ២០២៣
បង្កើតសហគមន៍កសិកម្ម មិនមែនធ្វើឲ្យកសិផលបានថ្លៃនោះទេ តែសហគមន៍កសិកម្ម ជាមូលដ្ឋានប្រមូលផ្តុំកម្លាំងផលិតស្របតាមស្តង់ដារទីផ្សារ អំណាចនៃការចចារ និងធានាបាននិរន្តរភាពទីផ្សារជាតម្លៃសមរម្យ
លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ ដឹកនាំសហការីសហការជាមួយមន្ទីរធនធានទឹកធនធានទឹកនិងឧតុនិយមខេត្តត្បូងឃ្មុំនិងរដ្ឋបាលឃុំព្រះធាតុ ស្រុកអូររាំងឪ រៀបចំផ្សព្វផ្សាយស្តីពីគោលគំនិតនៃការបង្កើតសហគមន៍កសិកម្ម ការអនុវត្តផលិតកម្មពូជស្រូវសុទ្ធល្អ និងការរៀបចំដីស្រែឲ្យបានរាបស្មើល្អដល់ប្រជាពលរដ្ឋក្នុងសហគមន៍កសិករប្រើប្រាស់ទឹក ក្បាលទឹក នៅភូមិក្បាលទឹក ឃុំព្រះធាត ស្រុកអូររាំងឪ ដោយមានប្រជាពលរដ្ឋចូលរួមចំនួន ២០នាក់ ក្នុងនោះស្រីចំនួន ១១នាក់។ 
លោកប្រធានមន្ទីរ បានមានប្រសាសន៍ថា  យើងមានអាងទឹកដែលអាចស្រោចស្រពបាន ២៥០ហិកតា ទាំងរដូវប្រាំង និងវស្សាដែលមានប្រជាពលរដ្ឋទទួលផលប្រមាណជាង៤០០គ្រួសារ នៅក្នុង ៥ភូមិ។ ស្ថានភាពដីស្រែនៅទីនេះ មានអំណោយផលអនុវត្តផលិតកម្មស្រូវពូជសុទ្ធល្អដែលមានតម្លៃខ្ពស់លើទីផ្សារ ផ្តល់ទិន្នផលខ្ពស់ ធានាបាននូវអង្ករសុទ្ធល្អឆ្លើយតបតម្រូងការទីផ្សារក្រៅប្រទេស និងដើម្បីជៀសវាងការចំណាយថវិកាច្រើនក្នុងការទិញពូជពីខាងក្រៅ ក៏ដូចជាប្តូរទម្លាប់ប្រើប្រាស់ពូជទុកដាក់តាមទម្លាប់។ ពូជមិនសុទ្ធល្អ នាំឲ្យទិន្នផលធ្លាក់ចុះនិងស្រូវមានតម្លៃទាប(ស្រូវចាប់ឆាយ)។
ទន្ទឹមនឹងការអនុវត្តផលិតកម្មស្រូវពូជនេះដែរ បងប្អូន ក៏ត្រូវរៀបចំដីស្រែឲ្យបានរៀបស្មើល្អ ដើម្បីងាយស្រួលក្នុងការបញ្ចេញបញ្ចូលទឹកតាមរយៈការប្រើប្រាស់ប្រព័ន្ធស្រោចស្រពអាងទឹកដែលមានស្រាប់។
អ្វីដែលសំខាន់ទៀតនោះ គឺយើងត្រូវតែរួបរួមគ្នាចងក្រងជាសហគមន៍កសិកម្ម ដើម្បីប្រមូលផ្ដុំកម្លាំងផលិតកម្ម អនុវត្តតាមបង្គុំបច្ចេកទេសស្របតាមស្តង់ដារតម្រូវរបស់ទីផ្សារ ពង្រឹងសមត្ថភាពធុរកិច្ចក្នុងសហគមន៍ បង្កើនអំណាចចចារការផ្គត់ផ្គង់ ចចារតម្លៃ ធានាបាននិរន្តរភាពទីផ្សារ។ រាជរដ្ឋាភិបាល អាណត្តិទី៧នៃរដ្ឋសភា នៅតែកំណត់វិស័យកសិកម្មជាអាទិភាព ហើយបានជំរុញឲ្យប្រជាកសិករចងក្រងជាសហគមន៍កសិកម្ម ដើម្បីមានសមត្ថភាពគ្រប់គ្រាន់ក្នុងការប្រកួតប្រជែងទីផ្សារក្រៅប្រទេស ក៏ដូចជាកាត់បន្ថយថ្លៃដើមផលិត ទទួលបានចំណូលកាន់តែប្រសើរ។