កម្មវិធីទី១ រសៀលថ្ងៃពុធ ១០រោច ខែ អស្សុជ ពុទ្ធសករាជ ២៥៦៧ ត្រូវនឹងថ្ងៃទី០៨ ខែវិច្ឆិកា ឆ្នាំ២០២៣ លោកប្រធានមន្ទីរ បានដឹកនាំមន្ត្រីជំនាញសហការជាមួយមន្ទីរធនធានទឹកនិងឧតុនិយម លោកមេឃុំជីគរ បានចុះពិនិត្យអាងទឹក និងសំណេះសំណាលជាមួយសហគមន៍កសិករប្រើប្រាស់ទឹកទួលព្រីងចំនួន៣៥នាក់ ក្នុងនោះស្រី ១៨នាក់ នៅភូមិទួលព្រីង ឃុំជីគរ ស្រុកត្បូងឃ្មុំ ដែលគាំទ្រដោយគម្រោងខ្សែច្រវាក់ផលិតកម្មដោយភាតរៈបរិស្ថាន (CFAVC) នៃក្រសួងកសិកម្ម រុក្ខាប្រមាញ់ និងនេសាទ។
ប្រធានសហគមន៍កសិករប្រើប្រាស់ទឹកទួលព្រីង បានរាយការណ៍ថា អាងទឹកទួលព្រីង មានទំហំ ៣៧០ហិកតា មានអ្នកប្រើប្រាស់ចំនួន ៣ភូមិ។
បន្ទាប់មកមន្ត្រីជំនាញបានបង្ហាញ ៖
+បច្ចេកទេសរៀបចំដីស្រែ
-ត្រូវភ្ជួររាស់២-៣ដង
-ត្រូវរៀបចំស្រែបានធំដើម្បីងាយស្រួលប្រើប្រាស់គ្រឿងយន្តកសិកម្ម ដូចជាត្រាក់ទ័រ និងម៉ាស៊ីនច្រូត
-ត្រូវរៀបចំភ្លឺស្រែឲ្យបានធំមាំដើម្បីរក្សាទឹក
-ត្រូវកៀរពង្រាបដីស្រែឲ្យបានរាបស្មើ
+ការផលិតពូជស្រូវសុទ្ធ
-ការជ្រើសរើសពូជដែលមានប្រភពច្បាស់លាស់ពូជសុទ្ធ មានតម្រូវការទីផ្សារ
-ការដាំដុះតាមបច្ចេកទេស
-ការកាត់ពូជលាយ -ការវេចខ្ចប់ដើម្បីធានាបានគ្រាប់ពូជសុទ្ធល្អប្រកបដោយគុណភាព
ក្នុងឱកាសនោះ លោកប្រធានមន្ទីរ បានផ្តល់ណែនាំតម្រង់ទិសដូចជា ៖
-សូមឲ្យនិស្សិតស្ម័គ្រចិត្ដ ធ្វើការជាមួយសហគមន៍កសិករប្រើប្រាស់ទឹក ត្រូវប្រមូលព័ត៌មានឲ្យបានច្បាស់ ដូចជាចំនួនអ្នកប្រើប្រាស់ទឹក ផ្ទៃដីស្រោចស្រពរដូវប្រាំងនិងរដូវវស្សា ប្រភេទពូជស្រូវដែលកសិករកំពុងប្រើប្រាស់
-សហការជាមួយឃុំ ស្រង់តម្រូវការវគ្គបណ្តុះបណ្តាលនិងបញ្ហានានា ដើម្បីដោះស្រាយជូនប្រជាកសិករ។
ជាមួយគ្នានេះដែរ លោកប្រធានមន្ទីរ បាន ណែនាំតម្រង់ទិស ឲ្យបង្កើតជាសហគមន៍កសិកម្ម ដើម្បីឲ្យប្រជាកសិកររួបរួមគ្នាប្រមូលផ្ដុំកម្លាំងផលិតកម្ម អនុវត្តតាមបង្គុំបច្ចេកទេសកសិកម្មដែលស្របតាមស្តង់ដារតម្រូវរបស់ទីផ្សារ ពង្រឹងសមត្ថភាពធុរកិច្ចក្នុងសហគមន៍ បង្កើនអំណាចចចារការផ្គត់ផ្គង់ អំណាចចចារតម្លៃជាមួយអ្នកប្រមូលទិញ ធានាបាននិរន្តរភាពទីផ្សារជាមួយតម្លៃកសិផលសមរម្យ។ រាជរដ្ឋាភិបាល នីតិកាលទី៧នៃរដ្ឋសភា បានកំណត់វិស័យកសិកម្ម ជាវិស័យអាទិភាព ក្នុងការគាំទ្រកំណើនសេដ្ឋកិច្ចជាតិនិងប្រាក់ចំណូលគ្រួសារកសិករ ហើយបានជំរុញឲ្យមានការចងក្រងជាសហគមន៍កសិកម្ម ដើម្បីមានសមត្ថភាពនិងលទ្ធភាពគ្រប់គ្រាន់ក្នុងប្រកួតប្រជែងទីភ្សារអន្តរជាតិ និងងាយទទួលបានការគាំទ្រពីរាជរដ្ឋាភិបាល។
