ជាក់ស្តែងការរៀបចំប្រព័ន្ធស្រោចស្រពស្វ័យប្រវត្តិដោយប្រើបន្ទះស្រូបពន្លឺព្រះអាទិត្យ ត្រូវបានតម្លើងជូនប្រជាកសិករ ក្នុងភូមិគោកស្រុក ឃុំគោកស្រុក ស្រុកតំបែរ ខេត្តត្បូងឃ្មុំ ដែលគាំទ្រពីកញ្ចប់ថវិការបស់រាជរដ្ឋាភិបាល អនុវត្តដោយក្រសួងកសិកម្ម រុក្ខាប្រមាញ់ និងនេសាទ។ តាមផែនការ ប្រព័ន្ធនេះ នឹងផ្តល់ទឹកសម្រាប់កសិករស្រោចស្រពដំណាំបន្លែដាំដុះនៅទីនោះ ៣០គ្រួសារ។

តាមមន្ត្រីជំនាញគម្រោងនេះ មានគោលបំណងផ្តល់ភាពងាយស្រួលដល់កសិករតាមរយៈការតភ្ជាប់បណ្តាញទឹកដល់ដីចម្ការកសិករតែម្តង មិនចំណាយថវិកាសម្រាប់បូមស្រោចស្រព ចំណេញពេលវេលា និងតម្រង់ទិសឲ្យកសិករចេះសន្សំសំចៃទឹកស្រោចស្រព។ ប្រព័ន្ធរៀបចំនេះ មិនអាចផ្គត់ផ្គង់ទឹកដល់កសិករក្នុងពេលតែមួយព្រមគ្នាបានទេ សហគមន៍កសិកម្មនៅទីនោះ ត្រូវរៀបចំផែនការផ្គត់ផ្គង់ទឹកដោយការឆ្លាស់វេនគ្នា និងប្រើប្រាស់ប្រព័ន្ធតំណក់ទឹកក្នុងការស្រោចស្រព។

ជម្រើសក្នុងការប្រើប្រាស់ប្រព័ន្ធតំណក់ទឹក នឹងផ្តល់ផលចំណេញយ៉ាងច្រើនសម្រាប់កសិករ។ កសិករ ត្រូវជឿជាក់លើបច្ចេកវិទ្យានេះ និងចូលរួមអនុវត្ត ដើម្បីកាត់បន្ថយចំណាយ បង្កើនចំណូល។