ក្នុងឆ្នាំ២០២០ ប្រជាជនកម្ពុជា បរិភោគសាច់សត្វសរុបប្រមាណ ៣០១ពាន់តោន ដែលផលិតកម្មក្នុងស្រុកមានលទ្ធភាពអាចផ្គត់ផ្គង់សាច់បានប្រមាណ ២៥៦ពាន់តោន ឬ ស្មើ ៨៥% ដែលទាមទារការនាំចូលសត្វ សាច់សត្វបន្ថែម ដើម្បីបង្គ្រប់តម្រូវការ។ ដូច្នេះ ការចូលរួមចិញ្ចឹមសត្វរបស់បងប្អូនប្រជាកសិករ នឹងអាចរួមចំណែកកាត់បន្ថយការនាំចូលសត្វពីខាងក្រៅប្រទេស។ ក្នុងវិបត្តិនៃការឆ្លងរាលដាលជំងឺកូវីដ ១៩ រាជរដ្ឋាភិបាល បានពិនិត្យឃើញថា វិស័យកសិកម្ម បានដើរតួជាអាទិភាពក្នុងការរក្សាប្រភពចំណូលរបស់គ្រួសារកសិករ ក៏ដូចជារក្សាស្ថិរភាពសេដ្ឋកិច្ចជាតិ ក្នុងពេលដែលវិស័យមួយចំនួនទៀត ត្រូវកកស្ទះ ដូចជាវិស័ួទេសចរណ៍ជាដើម។ ដើម្បីរួមចំណែកដោះស្រាយការលំបាកក្នុងការចំណាយលើថ្លៃដើមផលិតនិងដើម្បីបង្ហាញពីប្រសិទ្ធភាពនៃការផ្តល់បច្ចេកទេសកសិកម្មថ្មី ដែលធន់ទៅនឹងការប្រែប្រួលអាកាសធាតុ រាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រី តាមរយៈគម្រោង " កម្មវិធីផ្សព្វផ្សាយបច្ចេកទេសកសិកម្មថ្មី ដែលធន់ទៅនឹងការប្រែប្រួលអាកសធាតុ" ដឹកនាំសម្របសម្រួលទូទាំងប្រទេសដោយក្រសួងកសិកម្ម រុក្ខាប្រមាញ់ និងនេសាទ ហើយនៅថ្នាក់មូលដ្ឋានសម្របសម្រួលអនុវត្តដោយមន្ទីរកសិកម្ម រុក្ខាប្រមាញ់ និងនេសាទខេត្ត បានសហការជាមួយរដ្ឋបាលមូលដ្ឋាន ចងក្រងជាបណ្តុំអាជីវកម្ម ដើម្បីជំរុញកំណើនផលិតកម្ម ហើយផ្សារភ្ជាប់កសិផលទៅកាន់ទីផ្សារជាក់លាក់ គម្រោងបានផ្តល់ទុនសហវិនិយោគដល់កសិករជាសមាជិកបណ្តុំទៅតាមទំហំផលិតកម្ម បន្ថែមទៅលើការបណ្តុះបណ្តាលបច្ចេកទេស។ នេះជាការគិតគូរដល់សុខទុក្ខនិងជីវភាពរស់នៅរបស់បងប្អូនពីថ្នាក់ដឹកនាំ។ ហេតុនេះ សូមបងប្អូន យកចិត្តទុកដាក់និងមានការប្តេជ្ញាចិត្តខ្ពស់ ចិញ្ចឹមមាន់ដោយអនុវត្តត្រឹមត្រូវតាមបច្ចេកទេសដែលមន្ត្រីជំនាញផ្តល់ជូន ឲ្យទទួលបានផលល្អ ជាប្រភពចំណូលទ្រទ្រង់ជីវភាពគ្រួសារផងនិងជាដើមទុនពង្រីកអាជីវកម្មបន្តផង។ នេះជាប្រសាសន៍របស់ឯកឧត្តម ពាង ណារិទ្ធ អភិបាលរងនៃគណៈអភិបាលខេត្តត្បូងឃ្មុំ តំណាងដ៏ខ្ពង់ខ្ពស់ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ ក្នុងពិធីជួបសំណេះសំណាលសាកសួរសុខទុក្ខគ្រួសារកសិករសមាជិកបណ្តុំអាជីវកម្មចិញ្ចឹមមាន់ស្រែឃុំអំពិលតាពក ៣០គ្រួសារ នៅភូមិត្រពាំងឬស្សី ឃុំអំពិលតាពក ស្រុកអូររាំងឪ ខេត្តត្បូងឃ្មុំ កាលពីព្រឹកថ្ងៃចន្ទ ៧កើត ខែភទ្របទ ឆ្នាំឆ្លូវ ត្រីស័ក ព.ស. ២៥៦៥ ត្រូវថ្ងៃទី១៣ ខែកញ្ញា ឆ្នាំ២០២១។