ព្រឹកថ្ងៃចន្ទ ដដែលនេះ ឯកឧត្តម កេង ប៊ុនណា អភិបាលរង នៃគណៈអភិបាលខេត្តត្បូងឃ្មុំ រួមដំណើរដោយលោកប្រធានក្រុមប្រឹក្សាស្រុកត្បូងឃ្មុំ លោកអភិបាលស្រុកត្បូងឃ្មុំ លោកប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ លោកប្រធានការិយាល័យកសិកម្ម ធនធានធម្មជាតិ និងបរិស្ថានស្រុកត្បូងឃ្មុំ អញ្ជើញចុះសួរសុខទុក្ខ និងពិនិត្យការព្យាបាលជំងឺដុំពកលើស្បែកគោ ពីមន្រ្តីជំនាញការិយាល័យផលិតកម្មនិងបសុព្យាបាលខេត្ត ជូនបងប្អូនប្រជាពលរដ្ឋនៅភូមិទួលកែវ ឃុំជីរោទិ៍ទី១ ស្រុកត្បូងឃ្មុំ ខេត្តត្បូងឃ្មុំ។
មានប្រសាសន៍ក្នុងឱកាសចុះសួរសុខទុក្ខនិងពិនិត្យស្ថានភាពជំងឺ ឯកឧត្តមអភិបាលរងខេត្ត បានកោតសរសើរដល់មន្ត្រីជំនាញ បសុព្យាបាល ដែលបានប្រឹងប្រែងពិនិត្យ ព្យាបាលជំងឺគោជូនបង ប្អូនប្រជាកសិករ ដែលកើតជំងឺដុំពកលើស្បែកគោ នៅទូទាំងខេត្ត។ ដោយឡែកចំពោះបងប្អូនប្រជាកសិករដែលមានគោឈឺ ជាការគួរឲ្យសោកស្តាយណាស់ ព្រោះគោនេះ ជាប្រភពចំណូលរបស់បងប្អូន។ នេះ ជាទុក្ខលំបាករបស់បងប្អូន ហើយក៏ជាទុក្ខលំបាករបស់ថ្នាក់ដឹកនាំផងដែរ។ ហេតុនេះ សូមបងប្អូនសហការជាមួយមន្ត្រីជំនាញព្យាបាល ឲ្យបានឆាប់ជាសះស្បើយ។