ការអនុវត្តគោលការណ៍ "ការអនុវត្តកសិកម្មល្អ(GAP)" ចាំបាច់សម្រាប់ស្វាយនាំចេញ
បញ្ចប់វេទិកា នាពេលរសៀលថ្ងៃពុធ ទី៣ ខែមករា ឆ្នាំ២០២១ លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំនិងសហការី បានអម ដំណើរឯកឧត្តម ណី លន់ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ចុះពិនិត្យការប្រមូលផលនិងលក់ចេញស្វាយកែវរមៀត របស់កសិករ ញាណ ពិសិដ្ឋ (លេខទូរស័ព្ទ ០៩៧ ៥ ៨៨៨៨ ៣១) នៅភូមិច្រវាក់ដែក ឃុំឈូក ស្រុកក្រូចឆ្មារ ដែលបានដាំដុះស្វាយកែវរមៀតលើផ្ទៃដី ១០ហិកតា និងកំពុងប្រមូលផលលើផ្ទៃដី ២ហិកតា ទទួលបានបរិមាណផលស្វាយ ២៦តោនក្នុងមួយលើក(មួួយហិកតា បានប្រមាណ ១៣តោន ហើយស្វាយកែវរមៀតផ្តល់ផល ២ដងក្នុងមួយឆ្នាំ) លក់ទៅឲ្យឈ្មួញដែលបានសន្យាទិញស្វាយវេចខ្ចប់ ដោយប្រភេទផ្លែស្វាយចំណាត់ថ្នាក់លេខមួយ តម្លៃ ១ ៤០០រៀល/គ.ក្រ និងផ្លែស្វាយចំណាត់ថ្នាក់លេខពីរ តម្លៃ ៤០០រៀល/គ.ក្រ។ ការសន្យានេះ មានលក្ខខណ្ឌដូចតទៅ ៖
-ម្ចាស់ចម្ការ ត្រូវទទួលខុសត្រូវមើលថែពីស្វាយ ចាប់ចេញផ្ការហូតដល់ក្ដិប 
-ម្ចាស់ចម្ការ ត្រូវមើលថែទាំដាក់ទឹកនិងជី ដើម្បីឲ្យផ្លែស្វាយធំល្អ
-ភាគីអ្នកទិញ ទទួលរាប់រងវេចខ្ចប់និងការចំណាយវេចខ្ចប់ផ្លែស្វាយ
-នៅពេលដល់ថ្ងៃប្រមូលផល ភាគីអ្នកទិញ ជាអ្នកទទួលរ៉ាប់រងចំណាយថ្លៃបេះ វេចខ្ចប់ដាក់កេស និងលើកដាក់លើឡាន។
ក្នុងឱកាសនោះ ឯកឧត្តមរដ្ឋលេខាធិការ បានកោតសរសើរដល់លោក ញាណ ពិសិដ្ឋ ដែលបានខិតខំដាំដុះមើលថែស្វាយរហូតទទួលបានផលល្អ ស្របតាមការសន្យា ព្រមទាំង លក់បានតម្លៃសមរម្យ មិនកកស្ទះ។
បន្ថែមពីនេះទៀត ឯកឧត្តមរដ្ឋលេខាធិការ បានសំណូមពរបន្តការខិតខំថែទាំស្វាយឲ្យបានល្អ និងអនុវត្តតាមការសន្យាឲ្យបានត្រឹមត្រូវ ហើយបើកាន់តែល្អ ត្រូវចុះកិច្ចសន្យាផលិតកម្មកសិកម្ម ដែលមានការដឹងឮពីមន្ទីរកសិកម្ម រុក្ខាប្រមាញ់ និងនេសាទ។ ទន្ទឹមនេះ ឯកឧត្តមរដ្ឋលេខាធិការ បានផ្ដល់អនុសាសន៍បន្ថែមដូចជា ៖
-ត្រូវរៀបចំប្រព័ន្ធស្រោចស្រពដោយប្រើប្រព័ន្ធតំណក់ទឹក ដែលជាបច្ចេកទេសថ្មី សន្សំសំចៃទឹក ក្នុងបរិបទនៃការប្រែប្រួលអាកាសធាតុ ចំណេញទាំងពេលវេលា និងប្រាក់កាស  
-ត្រូវប្រុងប្រយ័ត្នក្នុងការប្រើប្រាស់ថ្នាំពុលគីមីនិងជីគីមី ចៀសវាងការប្រើខុសបច្ចេកទេស ដែលបណ្តាលឲ្យស្វាយមិនមានគុណភាព សុវត្ថិភាព សម្រាប់អ្នកបរិភោគ និងបាត់បង់ទីផ្សារ។ កាន់តែប្រសើរ ត្រូវអនុវត្តគោលការណ៍ "ការអនុវត្តកសិកម្មល្អ(GAP)" ដែលជាស្តង់ដារសុវត្ថិភាព មានការទទួលស្គាល់
-ត្រូវទាក់ទងទៅមន្ត្រីជំនាញកសិកម្ម ក្នុងករណីត្រូវការបច្ចេកទេសបន្ថែម។