ផ្ទៃដីស្រូវខូចខាតដោយជំនន់ទឹកភ្លៀងនិងទឹកទន្លេមេគង្គ ក្នុងខេត្តត្បូងឃ្មុំ ត្រូវបានស្តារឡើងវិញទាំងស្រុង
ព្រឹកថ្ងៃទី១០ ខែធ្នូ ឆ្នាំ២០២០ លោក យូ តាំងហ៊ី អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ
និងលោក ដុក សាវឿន ប្រធានការិយាល័យក្សេត្រសាស្ត្រ និងផលិតភាពកសិកម្ម បានសហការជាមួយ លោក សេង ថា ប្រធានការិយាល័យកសិកម្ម ធនធានធម្មជាតិ និងបរិស្ថានស្រុកអូររំាងឪ និងសហការី ដោយមានការចូលរួមពីអាជ្ញាធរ ភូមិ ឃុំ និងប្រជាពលរដ្ឋ បានចុះត្រួតពិនិត្យស្ថានភាពការដាំដុះស្រូវស្តារឡើងវិញក្រោយជំនន់ទឹកភ្លៀងនិងទឹកទន្លេមេគង្គ នាពេលកន្លងមក នៅឃុំព្រះធាតុ ឃុំអំពិលតាពក និងឃុំមៀន ស្រុកអូររាំងឪ ខេត្តត្បូងឃ្មុំ។ ស្រុកអូររាំងឪ ដំណាំស្រូវប្រាំងបានរងផលប៉ះពាល់និងខូចខាត ៣១២ហិកតា ដែលមានគ្រួសាររងគ្រោះសរុប ៤៥៥គ្រួសារ លើ ៣ឃុំ។ តាមការចុះពិនិត្យនិងវាយតម្លៃ ពិនិត្យឃើញថា គិតត្រឹមថ្ងៃទី១០ ខែធ្នូ ឆ្នាំ២០២០ នេះ កសិករធ្វើការដាំដុះស្តារស្រូវឡើងវិញបាន ១០០%ហើយ។ ជាទូទៅដំណាំស្រូវក្នុងស្រុកអូររាំងឪ មានការលូតលាស់ល្អប្រសើរ។
នាឱកាសនោះដែរ ក្រុមការងារបានណែនាំ និងផ្តាំផ្ញើដល់លោកមេឃុំ ជំទប់ឃុំ និងមេភូមិ បន្តជួយជំរុញផ្សព្វផ្សាយឲ្យប្រជាពលរដ្ឋ ឧស្សាហ៍ចុះពិនិត្យស្រែ ថែទាំកុំឲ្យមានស្មៅចង្រៃ សត្វល្អិត ដង្កូវ ឬកត្តាចង្រៃផ្សេងៗបំផ្លាញស្រូវ ឈានទៅការខូចខាតជាថ្មីទៀត។
សូមជម្រាបជូនថា ខេត្តត្បូងឃ្មុំ មានផ្ទៃដីស្រូវរដូវប្រាំងរងការខូចខាត ហើយស្តារឡើងវិញ ២ ១០៧ហិកតា នៅស្រុកចំនួន៣ គឺស្រយកក្រូចឆ្មារ ត្បូងឃ្មុំនុងស្រុកអូររាំងឪ ដោយទទួលបានស្រូវពូជ
សង្គ្រោះបន្ទាន់ពីរាជរដ្ឋាភិបាល តាមរយៈឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ និងជាប្រធានក្រុមការងាររាជរដ្ឋាភិបាលកម្ពុជា ចុះមូលដ្ឋានខេត្តត្បូងឃ្មុំ សរុប ១៣៨ ៥៥០គក្រ ក្នុងនោះ ៖
-ស្រុកត្បូងឃ្មុំទទួលបានស្រូវពូជ  ៥៦ ៥០០គក្រ
-ស្រុកក្រូចឆ្មារ ទទួលបានស្រូវពូជ ៦២ ០៥០គក្រ
-ស្រុកអូររាំងឪ ទទួលបានពូជ ២០ ០០០គក្រ។                                                        
គិតត្រឹមថ្ងៃទី១០ ខែធ្នូ ឆ្នាំ២០២០ ខេត្តត្បូងឃ្មុំ ផ្ទៃដីស្រូវស្តារឡើងវិញបាន ១០០%ហើយ។