ព្រឹកថ្ងៃសៅរ៍ ១៣កើត ខែមិគសិរ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៨ ខែវិច្ឆិកា ឆ្នាំ២០២០
លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ និងលោក កែន ច័ន្ទសុជាតិ អនុប្រធានការិយាល័យផលិតកម្មនិងបសុព្យាបាលខេត្ត បានអញ្ជើញចុះពិនិត្យស្ថានភាពនៃការចិញ្ចឹមមាន់យកស៊ុតរបស់កសិករ អ៊ាង ពន្លក (017 97 97 46) នៅភូមិជប់ទី២ ឃុំជប់ ស្រុកត្បូងឃ្មុំ ដែលមានរោងទទឹង ២៤ម៉ែត្រ បណ្ដោយ ៣៥ម៉ែត្រ មានមេមាន់សរុប ៥ ៧០០ក្បាល (មេមាន់ចាស់ចំនួន ២ ៧០០ក្បាល និងមេមាន់ពេញវ័យពងចំនួន ៣ ០០០ក្បាល) ដែលបានផ្តល់ស៊ុតមាន់ក្នុងមួយថ្ងៃបានរង្វង់ ៣ ០០០គ្រាប់។
លោក អ៊ាង ពន្លក បានរៀបរាប់ថា គាត់មានបទពិសោធន៍ចិញ្ចឹមមាន់មានរយៈពេល ១០ឆ្នាំមកហេីយ ដែលដំបូងចិញ្ចឹមមាន់យកសាច់រយៈពេល ៥ឆ្នាំ និងមាន់យកពងរយៈពេល ៥ឆ្នាំ។ បច្ចុប្បន្នគាត់កំពុងចិញ្ចឹមមាន់យកពង ដែលមេមាន់មួយក្បាល អាចផ្តល់ពងបាន ៣៥០គ្រាប់/ឆ្នាំ។ មេមាន់ថ្មីមានទម្ងន់ជាមធ្យម ១,៨គីឡូក្រាម និងមេមាន់ចាស់ទម្ងន់ជាមធ្យម ២គីឡូក្រាម/ក្បាល។ មេមាន់ដែលត្រូវជម្រុះចេញ មានអាយុយ៉ាងតិច ១ឆ្នាំ ៨ខែ អាស្រ័យតាមអត្រាផ្ដល់ស៊ុត ធ្លាក់ចុះ។
ចំពោះទីផ្សារ ពងមាន់ដែលផលិតមិនមានការលំបាកទីផ្សារនោះទេ បច្ចុប្បន្ន បានលក់ទៅខេត្តកំពង់ចាមនិងរាជធានីភ្នំពេញ។ ស៊ុតមាន់ ត្រូវបែងចែកជា ៤ប្រភេទគឺ លេខ១ ទម្ងន់ ២២គីឡូក្រាម/៣០០គ្រាប់ លក់បានតម្លៃ ១គ្រាប់ ៣៧០៛ លេខ២ ទម្ងន់ ២០-២០គីឡូក្រាម /៣០០គ្រាប់ លក់បាន ១គ្រាប់ ៣៤០៛ លេខ៣ ទម្ងន់ក្រោម ២០គីឡូក្រាម /៣០០គ្រាប់ លក់បាន ១គ្រាប់៣២០៛ និងលេខ៤ ទម្ងន់ក្រោម ១៨-១៦គីឡូក្រាម/៣០០គ្រាប់ លក់បាន ១គ្រាប់ ៣០០៛។ ចំពោះចំណីវិញ ផ្ដល់ឲ្យមាន់អស់ ១៨-២០បាវ/ថ្ងៃ។
ក្នុងឱកាសនោះ លោកប្រធានមន្ទីរ និងមន្ត្រីជំនាញ ព្រមទាំងមេៗ បានធ្វើការណែនាំតម្រង់ទិសពីបច្ចេកទេសដល់កសិករធ្វើយ៉ាងណាត្រូវគ្រប់គ្រងលាមកកុំឲ្យមានក្លិនដែលបង្កឲ្យប៉ះពាល់ដល់អ្នកជិតខាង ដោយប្រើប្រាស់ថ្នាំបំបាត់ក្លិន កំបោរ ឬ អង្កាម។ ត្រូវរក្សាលាមកឲ្យបានល្អសម្រាប់ជាជីដាក់ដំណាំផ្សេងៗ និងអាចយកទៅលក់ សម្រាប់ជាចំណូលបន្ថែមទៀត។
