ជ្រុងមួយនៃបច្ចេកទេសនិងបទពិសោធន៍ ដែលនាំទៅរកជោគជ័យក្នុងការដាំដុះដំណាំស្រូវ
វគ្គរៀបចំដីនិងការប្រើប្រាស់គ្រាប់ពូជ
ដី ទឹក ពន្លឺ ជាមូលដ្ឋានគ្រឹះក្នុងផលិតកម្មដំណាំ។ រុក្ខជាតិគ្រប់ប្រភេទ ត្រូវការសារធាតុចិញ្ចឹម ១៦ប្រភេទ ក្នុងនោះសារធាតុចិញ្ចឹមចាំបាច់ជាងគេ មាន អាស៊ូត(N) ផូស្វ័រ(P) ប៉ូតាស្យូម(K) ដែលមិនអាចខ្វះបានក្នុងការលូតលាស់និងផ្តល់ផល។ ទន្ទឹមនោះ ការជ្រើសរើសពូជ រៀបចំដី ការថែទាំ និងការប្រមូលផល ក៏ត្រូវយកចិត្តទុកដាក់ខ្ពស់។ ដូចនេះ ដើម្បីទទួលបានជោគជ័យក្នុងផលិតកម្មដំណាំស្រូវ ក្នុងនាមជាមន្ត្រីបច្ចេកទេស សូមផ្តល់ជូននូវយន្តការនិងវិធានបច្ចេកទេសខ្លីៗ សំខាន់ៗ មួយចំនួន ដូចតទៅ ៖
ស្ថានភាពទូទៅ ៖ 
តាមការសិក្សាស្រាវជ្រាវ ប្រភេទពូជស្រូវប្រើប្រាស់ក្នុងខេត្តត្បូងឃ្មុំ
-ស្រូវស្រាល  មានដាំប្រភេទពូជសែនពិដោរ សែនក្រអូប ខា១៥ អ៊ីអ៊ែរ ៦៦ OM៤៩ OM៥៤៥១ អាយុកាល ៨៥ថ្ងៃ ទៅ១២០ថ្ងៃ ហើយដាំដុះនៅក្នុងខែមីនា មេសា ឧសភា កញ្ញា តុលា វិច្ឆិកា និងខែធ្នូ។
-ស្រូវកណ្តាល  មានដាំប្រភេទពូជផ្ការំដួល ផ្កាមាលតី ផ្ការមៀត និងពូជស្រូវប្រពៃណី អាយុកាល ១២០ថ្ងៃ ទៅ១៦០ថ្ងៃ និងអាចប្រមូលផលនៅចាប់ពីចុងខែតុលាដល់ខែវិច្ឆិកា ហើយដាំដុះនៅក្នុងខែមេសា ឧសភា មិថុនា និងខែកក្កដា។
-ស្រូវធ្ងន់ មានដាំប្រភេទពូជរាំងជ័យ ខា៤ ខា៦ ខា២ និងពូជស្រូវប្រពៃណី ស្អាង នាងស អាយុកាលលើសពី ១៦០ថ្ងៃ និងអាចប្រមូលផលចាប់ពីចុងខែវិច្ឆិកា ដល់ខែធ្នូ ហើយដាំដុះក្នុង ខែមេសា ឧសភា មិថុនា កក្កដា និងខែសីហា។
១.ការរៀបចំដី ៖ 
ដី ត្រូវរាបស្មើល្អ មានភ្លឺស្រែធំមាំល្អ ងាយស្រួលគ្រប់គ្រងទឹក បង្ហូរទឹកចូល ឬ រំដោះទឹកចេញ។ ការភ្ជួរដីលើកទី១ ត្រូវចាប់ផ្តើមនៅក្រោយពេលច្រូតកាត់ភ្លាមៗ ព្រោះដីនៅមានសំណើមសមស្របអាចភ្ជួរបាន ជាពិសេសដើម្បីលុបកាកសំណល់ ដូចជា គល់ជញ្ជ្រាំងទៅក្នុងដីធ្វើជាជី។ ពេលវេលានៃការភ្ជូរលើកទី២ អាចធ្វើមុនពេលព្រោះ ឬ ស្ទូង រយៈពេលពី ២ ទៅ ៣សប្តាហ៍ ដើម្បីប្រែត្រលប់ដី ដីម៉ដ្ឋល្អ និងងាយស្រួលក្នុងការកៀរពង្រាបឲ្យស្មើ។ សម្រាប់ស្រែស្រូវរដូវប្រាំង ឬស្រែស្រូវប្រដេញទឹក ការភ្ជួរដី គួរអនុវត្តមុនពេលទឹកលិច ក្នុងជម្រៅចាប់ពី ១៥ស.ម ទៅ ២៥ស.ម។ ហើយការរាស់ និងកៀរពង្រាបដី ត្រូវអនុវត្តពេលទឹកស្រកទៅវិញ សម្រាប់ព្រោះ ឬស្ទូង។
២.ការជ្រើសរើសពូជ ៖ 
ពូជ ដើរតួនាទីយ៉ាងសំខាន់ក្នុងផលិតកម្មដំណាំ។ កសិករត្រូវជ្រើសរើសប្រភេទពូជដែល ផ្តល់ទិន្នផលខ្ពស់ ធន់កត្តាចង្រៃ (សត្វល្អិត ស្មៅ និងជំងឺ) ការប្រែប្រួលអាកាសធាតុ និង ស្ថានភាពតំបន់ដាំដុះ។ ពូជដែលល្អ ឬសមស្របជាងគេបំផុត គឺជាពូជដែលត្រូវនឹង តម្រូវការរបស់កសិករនិងទីផ្សារ។
  គ្រាប់ពូជដែលមានគុណភាពល្អត្រូវមាន ៖
- ភាពសុទ្ធ           ៖ មិនទាបជាង ៩៥%
- ដំណុះគ្រាប់      ៖ មិនទាបជាង ៨០%
- សំណើមគ្រាប់   ៖ មិនខ្ពស់ជាង ១៤%
- គ្រាប់ស្មៅចង្រៃនិងដំណាំផ្សេងៗ ៖ ០.‌១%
- គ្រាប់ពូជស្រូវផ្សេងៗ ៖ ១០គ្រាប់/៥០០ក្រាម។
៣-ការប្រើប្រាស់គ្រាប់ពូជ ៖ 
តាមបទដ្ឋានបច្ចេកទេស បរិមាណគ្រាប់ពូជស្រូវ (ប្រើតាមរយៈការព្រោះ) អាស្រ័យតាម ប្រភេទស្រូវ ៖
- ស្រូវស្រាល បរិមាណ ១២០-១៥០គ.ក្រ/ហ.ត (ស្រូវសែនពិដោរ សែនក្រអូប ១ ខា១៥ OM៤៩ OM៥៤៥១)
- ស្រូវកណ្តាល បរិមាណ ១០០-១២០គ.ក្រ/ហ.ត (ស្រូវផ្ការំដួល ផ្កាមាលតី ផ្ការមៀត...)
- ស្រូវធ្ងន់ បរិមាណ ៨០-១០០គ.ក្រ/ហ.ត (ស្រូវខា២ ខា៤ ខា រាំងជ័យ.....)
***កសិករភាគច្រើន ព្រោះគ្រាប់ពូជស្រូវមានចំនួនច្រើនជាងបច្ចេកទេសបានណែនាំដល់ទៅ ២ដង។
ស្រាវជ្រាវរៀបចំដោយ ៖ លោក ង៉ែត សំបឿន អនុប្រធានការិយាល័យក្សេត្រសាស្ត្រនិងផលិតភាពកសិកម្ម ទូរស័ព្ទលេខ ០៨៨ ៥៣ ៥១ ៣៣៣
ត្រួតពិនិត្យនិងកែសម្រួលដោយ ៖ 
-លោក ដុក សាវឿន ប្រធានការិយាល័យក្សេត្រសាស្ត្រនិងផលិតភាពកសិកម្មខេត្តត្បូងឃ្មុំ ទូរស័ព្ទលេខ ០៨៨ ៩៥ ៥៥ ៣៣២
-លោក សន មិនា ប្រធានការិយាល័យគ្រឿងយន្តកសិកម្មខេត្តត្បូងឃ្មុំ ទូរស័ព្ទលេខ ០៧១ ៥៩ ៥៩ ២៧១