ព្រឹកថ្ងៃសៅរ៍ ទី២៦ ខែកញ្ញា ឆ្នាំ២០២០
កម្មវិធីទី២
ឯកឧត្តម ប្រាជ្ញ​ ចន្ទ​ ប្រធានគណៈកម្មការទី១នៃរដ្ឋសភាជាតិ ដោយមានការចូលរួមពីឯកឧត្តម ស៊ាង ឡេង  ប្រធានក្រុមប្រឹក្សាខេត្ត ឯកឧត្តម ជាម ច័ន្ទសោភ័ណ អភិបាលនៃគណៈអភិបាលខេត្ត ឯកឧត្តម លោកជំទាវអភិបាលរងខេត្ត មន្ទីរ អង្គភាព មន្ត្រីរាជការ សិស្សានុសិស្ស បានអញ្ជើញដាំនិងចែកកូនឈើប្រណិត (ក្រញូង បេង ធ្នង់) ចំនួន​ ៣ ០០០ដើម  ជូនវិទ្យាល័យ ១៥ ប្រគេនវត្តចំនួន​១៥ និងមណ្ឌលសុខភាពចំនួន២​ ក្នុងស្រុកត្បូងឃ្មុំ ខេត្តត្បូងឃ្មំុ សម្រាប់ដាំរួមចំណែករក្សាបរិស្ថាន បង្កើតភាពបៃតងស្រស់។ ពិធីនេះរៀបចំនៅបរិវេណវិទ្យាល័យហ៊ុនសែនខ្នារ ស្ថិតក្នុងឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ។
ឯកឧត្តម បានណែនាំអាជ្ញាធរមូលដ្ឋាន ឃុំ ស្រុក ត្រូវពិនិត្យកន្លែងណា ដែលអាចដាំកូនឈើបាន ដូចជា សាលារៀន វត្តអារាម និងកន្លែងសាធារណៈផ្សេងៗ ដើម្បីដាំ ហើយខណ្ឌរដ្ឋបាលព្រៃឈើ នៃមន្ទីរកសិកម្ម រុក្ខាប្រមាញ់ និងនេសាទខេត្ត ត្រូវតាមដានជាប្រចាំជួយជំរុញដាំឲ្យបានឆាប់ ព្រោះចុងរដូវភ្លៀងធ្លាក់ហើយ។
ព្រៃឈើរក្សាលំនឹងបរិស្ថាន ផ្តល់នូវភាពបៃតង ភាពស្រស់បំព្រង និងរក្សាស្ថេរភាពបរិស្ថាន ដែលជាមរតកដ៏មានតម្លៃសម្រាប់កូនចៅគ្រប់ជំនាន់។
ដូច្នេះយើងទាំងអស់គ្នា ចូលរួមដាំកូនឈើ ឲ្យបានគ្រប់គ្នា គ្រប់ទីកន្លែង។