ពិធីសំណេះសំណាលនិងប្រគល់ធាតុចូលកសិកម្មដល់សមាជិកបណ្តុំអាជីវកម្មផលិតបន្លែឃុំទួលសូភី ដែលមានសមាជិកចំនួន ៤១គ្រួសារ ក្រោមអធិបតីភាពលោក ងួន ប៊ុណ្ណាន អភិបាល នៃគណៈអភិបាលស្រុកអូររាំងឪ និងលោក ស៊ឹម ធី  អនុប្រធាន មន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ រួមទាំងលោកអភិបាលរងស្រុក លោកមេឃុំ និងសហការី នៃមន្ត្រីអនុវត្តកម្មវិធីផ្សព្វផ្សាយបច្ចេកទេសកសិកម្មថ្មី ដែលធន់ទៅនឹងការប្រែប្រួលអាកាសធាតុ របស់ក្រសួងកសិកម្ម រុក្ខាប្រមាញ់ និងនេសាទ នៅ ភូមិក្បាលអូរ  ឃុំទួលសូភី ស្រុកអូររាំងឪ ខេត្តត្បូងឃ្មុំ។  ក្នុងពិធីសំណេះសំណាលប្រគល់ធាតុចូលកសិកម្មដល់សមាជិកបណ្តុំនេះ  លោកអភិបាលស្រុកបានផ្តាំផ្ញើដល់សមាជិកបណ្តុំអាជីវកម្ម ត្រូវប្រឹងប្រែង អនុវត្តឲ្យបានត្រឹមត្រូវតាមការណែនាំបច្ចេកទេសពីមន្ត្រីជំនាញ ត្រូវយកចិត្តទុកដាក់បង្កបង្កើតផលឲ្យក្លាយជាចំណូល និងដើមទុនដើម្បីពង្រីកទំហំផលិតបន្លែឲ្យទទួលបានទិន្នផលខ្ពស់។
សូមជម្រាបជូនថា កម្មវិធីនេះជាកម្មវិធីផ្សព្វផ្សាយបច្ចេកទេសកសិកម្មថ្មី ដែលធន់ទៅនឹងការប្រែប្រួលអាកាសធាតុ(ASPIRE) នៃក្រសួងកសិកម្ម រុក្ខាប្រមាញ់ និងនេសាទ  និងមូលនិធិអភិវឌ្ឍន៍កសិកម្ម(IFAD)។
   ឆ្លៀតក្នុងឱកាសនេះដែរ លោកអភិបាលស្រុក និងលោកអនុប្រធានមន្ទីរកសិកម្មខេត្ត បានសំណូមពរបងប្អូន ត្រូវយកចិត្តទុកដាក់ការពារខ្លួនពីជំងឺកូវីដ ១៩  និងសូមបងប្អូន មាមីង មានសុខភាពល្អ ប្រកបរបរទទួលទានមានបាន ជាពិសេសជៀសផុតពីជំងឺឆ្លងកូវីដ ១៩ ទាំងអស់គ្នា។
ព្រឹកថ្ងៃអង្គារ  ១៥កើត ខែស្រាពណ៍ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី០៤ ខែកក្កដា ឆ្នាំ២០២០។