រសៀលចុងម៉ោង ថ្ងៃព្រហស្បតិ៍ ៧កេីត ខែជេស្ឋ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី២៨ ខែឧសភា ឆ្នាំ២០២០ លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានអញ្ជើញចុះពិនិត្យស្ថានភាពដំណាំបន្លែរបស់ប្រជាកសិករ នៅភូមិគោកស្រុក ឃុំគោកស្រុក ស្រុកតំបែរ ដែលមានដូចជាស្ពៃចង្កឹះ ឆៃថាវ និងខ្ទឹមស្លឹក លើផ្ទៃដីប្រមាណ ១ហិកតា។
ក្នុងឱកាសនោះ លោកប្រធានមន្ទីរ បានធ្វើការណែនាំតម្រង់ទិសដល់ប្រជាកសិករមួយចំនួនដូចជា ៖
-ត្រូវរៀបចំសំណាញ់ព័ទ្ធជុំវិញដីដាំដុះ ឲ្យបានមាំទាំដែលអាចទប់ស្កាត់សត្វល្អិតចង្រៃចូលបំផ្លាញដំណាំ
-ត្រូវប្រេីប្រាស់ជីលាមកគោ ជ្រូក ធ្យូងអង្កាម ដើម្បីកាត់បន្ថយការប្រើជីគីមី
-ត្រូវរៀបចំរងឲ្យបានសមល្មមអាចឈោងដៃសម្អាតស្មៅបាន ត្រង់ ខ្ពស់ជាងដីរាបប្រមាណ ១០ស.ម ដេីម្បីងាយស្រួលក្នុងការថែទាំ ស្រោចស្រពទឹក កម្ចាត់ស្មៅចង្រៃ ជៀសវាងដីជាំទឹក
-ត្រូវប្រេីប្រាស់ជីទៅតាមលក្ខណៈបច្ចេកទេស សមស្របតាមដំណាក់កាលលូតលាស់របស់ដំណាំ
-ត្រូវរៀបចំផែនការដាំដុះលក្ខណ:បណ្ដាក់គ្នា ធ្វេីយ៉ាងណាឲ្យការប្រមូលផលបានជាប្រចាំ និងដាំឲ្យបានច្រេីនមុខដំណាំលេីផ្ទៃដីតែមួយ
-ការប្រេីប្រាស់ថ្នាំពុលកសិកម្ម ត្រូវស្របទៅតាមបទដ្ឋានបច្ចេកទេស ដេីម្បីធានាដល់សុខភាពអ្នកប្រើប្រាស់និងសុខភាពខ្លួនឯង។
