ដំណាំត្រសក់ចំណារ ជាដំណាំបន្លែមួយប្រភេទមានលក្ខណៈជាវល្លិ៍ដែលអាចដាំបានគ្រប់រដូវកាល ដោយដាំលើក ជារង និងដាក់ចំណារ ឬទ្រើង។ ដំណាំត្រសក់ចំណារមានអាយុកាលប្រមាណ៣៥ -៥០ថ្ងៃ ចាប់ផ្តើមប្រមូលផល។ ដោយឡែក នៅក្នុង ឃុំល្ងៀង ស្រុកត្បូឃ្មុំ ខេត្តត្បូងឃ្មុំ កសិករមានការដាំដុះប្រមានណពី២៥-៣០ភាគរយ នៃផ្ទៃដីដាំដុះបន្លែ ភាគច្រើន កសិករនិយមដាំដុះប្រភេទពូជស្រាលដែលត្រូវប្រមូលផលក្រោយពេលដាំរយៈពេល ៣០-៣៥ថ្ងៃ។
ខាងក្រោមនេះជាបទពិសោធន៍ជោគជ័យរបស់កសិករ ភីន ភៀន ក្នុងការអនុវត្តដាំដុះដំណាំត្រសក់ ចំណារនៅចុង រដូវវស្សា លើផ្ទៃដី២០អារ ក្រុមដីកំពង់សៀមមានគ្រោះ នៅក្នុងភូមិ ស្មោញ ឃុំល្ងៀង ស្រុកត្បូឃ្មុំ ខេត្តត្បូងឃ្មុំ ដើម្បីចែក រំលែក បទពិសោធន៍ ទាំងនេះដល់កសិករដាំ និងមានបំណង ដាំដុះ ដំណាំត្រសក់ចំណារ ឲ្យទទួលបានជោគជ័យ។
ក្នុងការដាំដុះដំណាំត្រសក់ចំណារកសិករ ភីន ភៀន បានបង្ហាញថា សំខាន់ត្រូវរៀបចំដីឲ្យបានស្អាតល្អដោយ ភ្ជួរដីចំនួន២ដង។ ភ្ជួរលើកទី១ត្រូវហាលដីឲ្យបាន៧ថ្ងៃដើម្បីសម្លាប់មេរោគ និងសត្វល្អិតចង្រៃផ្សេងៗនៅក្នុងដី និង សម្អាតស្មៅឲ្យបានស្អាត។ បន្ទាប់ហាលដី ៧ថ្ងៃ កសិករ ភីន ភៀន បានភ្ជួរត្រឡប់ដី និងរាស់សម្អាតស្មៅជាលើកទី២ និងចាប់ផ្តើមឆូតផ្គុំជារងកម្ពស់០,២៥ម ទទឹងរង១ម និងបណ្តោយ៤០ម ដោយប្រើជីលាមកគោ ០,៥គក្រ និងកែងៗ១៥-១៥-១៥ ចំនួន៧,៥ក្រាម សម្រាប់ទ្រាប់បាទក្នុងមួយរណ្តៅ ហើយគ្របកៅស៊ូប្លាស្ទីកដោយយកពណ៌ទឹកប្រាក់ឡើងលើ។
គាត់ប្រើប្រាស់គ្រាប់ពូជត្រសក់ទិញពីផ្សារ ក្រុមហ៊ុន អ៊ីស្វេសស៊ីដ មានសញ្ញាព្រួញបុក និងមានរូបផ្លែត្រសក់៨ ដោយយកគ្រាប់ពូជទៅត្រាំទឹកក្តៅឧណ្ឌៗប្រមាណ២០នាទី ហើយយកទៅត្រាំទឹកស្អាតរយៈពេល៨ម៉ោង ហើយផ្អាប់ រយៈពេល២៤ម៉ោង(បែកមាត់ចាប) បន្ទាប់គាត់យកទៅដាំនៅក្នុងរណ្តៅដែលបានរៀបចំ បន្ទាប់គាត់យកទៅដាំនៅក្នុង រណ្តៅ ដែលមានចន្លោះគុម្ព៥០x៦០ស.ម ដោយដាំមួយរណ្តៅចំនួន២គ្រាប់។
បន្ទាប់ពីដាំបានរយៈពេល ២សប្តាហ៍ ត្រូវថែមជី អ៊ុយរ៉េ ១០ក្រាមក្នុង១គុម្ពកប់រាក់ៗ ចម្ងាយពីគុម្ព ៥ស.ម។ រយៈពេល៤សប្តាហ៍ ថែមជី ១៥-១៥-១៥ ចំនួន២៥ក្រាម លាយជាមួយជីអ៊ុយរ៉េ ២៥ក្រាម ក្នុង ១គុម្ព កប់រាក់ៗចម្ងាយ ១០ស.ម ពីគុម្ពត្រសក់។ បន្ទាប់ពីដាំត្រសក់បាន ៥សប្តាហ៍ ថែមជីប៉ូតាស្យូម ១៥ក្រាមក្នុង១គុម្ព កប់រាក់ៗចម្ងាយ ១៥ស.ម ពីគុម្ព។ដាំបានពី៦សប្តាហ៍និងសប្តាហ៍ទី៨ថែមជី១៥-១៥-១៥ចំនួន២៥ក្រាមទៀត។ ចំពោះការសម្អាតស្មៅក្នុងនិង ជុំវិញ ចម្ការ កសិករ ភីន ភៀន ធ្វើជាប្រចាំ។ ការស្រោចស្រព កសិករ ភីន ភៀន បានប្រើប្រាស់ទឹកអណ្តូង ដោយប្រើប្រព័ន្ធ ទុយោ ដំណក់ និងទុយោបាចសាចដោយស្រោចចំនួន២ដងក្នុងមួយថ្ងៃ ពេលព្រឹកវេលាម៉ោង៧ព្រឹក និងពេលល្ងាចវេលា ម៉ោង៤: ៣០នាទី និងត្រូវកាត់ស្លឹកចាស់ៗផ្នែកក្រោម និងខ្នែងចេញខ្លះនៅកន្លែងដែលក្រាស់ចេញ ។
នៅក្នុងការដាំដុះដំណាំត្រសក់ចំណារ កសិករ ភីន ភៀន បានជួបបញ្ហាដូចជា សត្វអណ្តើកមាស ស្រមោច រុយស និងដង្កូវស៊ីត្រួយ។ បញ្ហានេះគាត់មានដំណោះស្រាយ ចំពោះសត្វល្អិតគាត់បានប្រើប្រាស់វិធីសាស្ត្រកម្ចាត់ដោយមេកានិក និងប្រើប្រាស់ថ្នាំគីមីដែលមានធាតុសកម្មAbamectin ។
ការប្រមូលផលធ្វើឡើងចាប់តាំងពីដាំបានរយៈពេល៣៥ថ្ងៃ និងបន្តបេះរហូតដល់អស់ផ្លែរយៈពេល ៣៥ថ្ងៃទៀត។ ចំពោះការប្រមូលផលត្រសក់ គាត់ធ្វើឡើងនៅពេលព្រឹកព្រលឹមនិងទុកក្រោមម្លប់ ដើម្បីកុំឲ្យអន់គុណភាព។ នៅក្នងផ្ទៃដី ២០អារ កសិករ ភីន ភៀន ទទួលបានបរិមាណផល ៩តោន ដែលទទួលបានថវិកាសរុបចំនួន ៩ ១០០ ០០០រៀល។ នៅក្នុងការដាំដំណាំត្រសក់នេះគាត់ចំណាយថ្លៃដើមសរុបចំនួន ១ ៨០០ ០០០រៀល ចំណេញសុទ្ធចំនួន ៧ ៣០០ ០០០រៀល។
