កង្វល់ពីតម្លៃស្រូវរដូវ ប្រាំងរបស់កសិករនៅភូមិដូនម៉ៅក្រោម ត្រូវបានរកឃើញដំណោះ ស្រាយរួម
នារសៀល ថ្ងៃសៅរ៍ ១០កើត ខែបុស្ស ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃសៅរ៍ ទី៤ខែមករា ឆ្នាំ២០២០ លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ និងសហការី បានបន្តចុះពិនិត្យស្ថានភាពដំណាំ ស្រូវរដូវប្រាំងនិងដោះ ស្រាយកង្វល់របស់ប្រជា កសិករជាសមាជិកសហគមន៍នេសាទ សាមគ្គីមាត់ឃ្មង់ ១៧ នាក់ នៅភូមិដូនម៉ៅក្រោម ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ អំពីតម្លៃស្រូវរបស់គាត់នាពេលខាងមុខ។ ក្នុងការពិនិត្យស្ថានភាពដំណាំស្រូវរដូវប្រាំង មានលក្ខណៈសមរម្យ ដោយឡែកស្រូវពូជខា១៥ ដែលកសិករបានទិញពីប្រភពច្បាស់ លាស់ មានការលូត លាស់និងផ្តល់ទិន្នផល គួរឲ្យកត់សម្គាល់។
បន្ទាប់ពីការពិនិត្យជាក់ ស្តែងនិងការពិគ្រោះយោបល់គ្នា រកមូល ហេតុបណ្តាលឲ្យមានកង្វល់ ការពិភាក្សាបានរកឃើញដំណោះស្រាយរួម ដូចខាងក្រោម ៖
១ -ការដាំដុះ ត្រូវអនុវត្តតាមគោលការណ៍បច្ចេក ទេស ចាប់ពីការរៀបចំដីរហូតដល់ក្រោយការប្រមូលផល។ ការរៀបចំដី ត្រូវរៀបស្មើល្អ ភ្លឺធន់នឹងជម្រាបទឹក ការថែទាំដាក់ជី កម្ចាត់កត្តាចង្រៃ ត្រូវមានការណែនាំពីអ្នក បច្ចេកទេសត្រឹមត្រូវ ការជ្រើសរើសម៉ាសុីនច្រូត កាត់ ដែលសមស្របតាមស្ថានភាពដើមស្រូវ។
២-ការជ្រើសរើសពេល វេលាដាំដុះដំណាំស្រូវ ឲ្យដំណាលគ្នា តំបន់ដែលមានស្ថានភាពដីនិងទឹកប្រហាក់ប្រហែល គ្នា ដើម្បីឲ្យការប្រមូលផលស្រូវ មានលក្ខណ: ប្រមូលផ្ដុំ សុីគ្នាទៅនឹងមធ្យោបាយដឹកជញ្ជូនរបស់ឈ្នួញកណ្ដាល ឬ ម្ចាស់រោងម៉ាស៊ីនកិនស្រូវ កាត់បន្ថយចំណាយលើការដឹក ជញ្ជូននិងសម្ងួត។
៣-ការទិញពូជមកប្រើ ប្រាស់ ត្រូវពិនិត្យប្រភព ដែលមានបញ្ជាក់ពីគុណភាពត្រឹមត្រូវ ហើយជាពូជដែលជាតម្រូវការរបស់ទីផ្សារ។ បរិមាណពូជត្រូវប្រើ គឺ សមស្រប ដោយមិនត្រូវគិតថា ប្រើពូជច្រើន ដើម្បីជាមធ្យោបាយទប់ស្កាត់ មិនឲ្យស្មៅចង្រៃដុះប្រជែងនោះទេ ត្រូវទុកឱកាសឲ្យដើមស្រូវបែកគុម្ពឲ្យបានច្រើន។
៤-កសិករ ត្រូវចងក្រងជាក្រុម ឬ ជាសហគមន៍ ដើម្បីប្រមូលផ្តុំនិងលក់កសិផល ដែលអាចពង្រីកអំណាចចចារតម្លៃ ទប់ស្កាត់ការបង្អាប់តម្លៃ និងឈានទៅការអនុវត្ត ផលិតកម្មកសិកម្មតាមកិច្ចសន្យា ដែលធានានិរន្តរភាពទីផ្សារនិងតម្លៃបានសមរម្យ។
៥-កសិករ ត្រូវផ្ដល់ព័ត៌មានជាក់លាក់ទាក់ ទងទៅនឹងផលិតកម្មស្រូវរបស់ខ្លួន ជា ពិសេស ពេលវេលាត្រូវប្រមូលផល ទៅក្រុម ឬ សហគមន៍ និងបញ្ជូនបន្តមកជំនាញ ដើម្បីពាំនាំទៅដល់អ្នកបញ្ជាទិញ។
