ថ្ងៃចន្ទ ៤កើត ខែចេត្រ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃ៨ ខែមេសា ឆ្នាំ២០១៩ លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានដឹកនាំសហការី ចូលរួមពិធីចែកពូជបន្លែជូនដល់កសិករនៅភូមិត្រពាំងសង្កែ ឃុំស្រឡប់ ស្រុកត្បូងឃ្មុំ ដែលរៀបចំដោយអង្គការក្រុមទ្រទ្រង់ភូមិ(VSG) គាំទ្រដោយអង្កការ Hellen Keler International (HKI)។

ក្នុងឱកាសនោះ លោកប្រធានមន្ទីរ បានផ្តល់នូវគោលគំនិតមួយចំនួនដូចខាងក្រោម ៖

-តាមរយៈបទពិសោធន៍ទទួលបានពីការដាំបន្លែជាលក្ខណៈគ្រួសារសម្រាប់អាហារូបត្ថម្ភ ត្រូវពង្រីកការដាំបន្លែជាលក្ខណៈពាណិជ្ជកម្ម ដើម្បីបង្កើនចំណូលក្នុងគ្រួសារ បំពេញតម្រូវការទីផ្សារដែលកំពុងខ្វះខាត
-ត្រូវធ្វើដាំដុះជាក្រុម ដោយរៀបចំផែនការដាំដុះកុំឲ្យជាន់គ្នា មានទំនាក់ទំនងទីផ្សារឲ្យបានជាប់លាប់ ដាំពូជដែលជាតម្រូវការទីផ្សារ
-ពិនិត្យលទ្ធភាពកែប្រែដីស្រែ មកដាំដុះបន្លែ 
-ត្រូវអនុវត្តតាមបទដ្ឋានបច្ចេកទេសកសិកម្មថ្មី និងប្រើប្រាស់ធាតុចូលកសិកម្ម ដែលធានាឲ្យបានផលិតផលបន្លែរបស់យើងរក្សាបានសុវត្ថិភាពសម្រាប់អ្នកបរិភោគ។
-កសិករត្រូវព្យាយាមកែច្នៃជីនិងថ្នាំពុលបែបធម្មជាតិដោយខ្លួនឯង ជៀសវាងការចំណាយលើជីនិងថ្នាំពុលគីមី
-កសិករ ត្រូវចិញ្ចឹមសត្វបន្ថែម សាច់សម្រាប់លក់ លាមកសម្រាប់ជី។

ឆ្លៀតក្នុងឱកាសនោះ លោកប្រធានមន្ទីរបានធ្វើការណែនាំដល់កសិករពីបច្ចេកទេសជ្រើសរើសពូជថែរក្សាពូជ និងវិធានទប់ស្កាត់ជំងឺម៉ូសាអុិច លើដំណាំដំឡូងមី ៖
-ត្រូវជ្រើសរើសនិងរក្សាទុកដាក់ដើមពូជដំឡូងមីដែលគ្មានជំងឺសម្រាប់ដំាដុះនៅរដូវបន្ទាប់
-ចុះពិនិត្យចម្ការដំឡូងមីជាប្រចាំ បើសិនឃើញរោគសញ្ញាជំងឺនេះ ត្រូវដកយកទៅដុតចោល និងចាត់វិធានការកម្ចាត់រុយស ដែលជាភ្នាក់ងារចម្លងជំងឺ
-ត្រូវសម្អាតស្មៅឲ្យបានស្អាត និងរៀបចំដីឲ្យបានល្អមុនពេលដាំ
-ត្រូវប្រើប្រាស់ជី ឲ្យត្រូវតាមបច្ចេកទេស
-ក្រោយពេលប្រមូលផលត្រូវសម្អាតកាកសំណល់ដំឡូងមី និងស្មៅចង្រៃយកទៅដុតចោលហាលដីមួយរយៈពេលខ្លី ដើម្បីកាត់បន្ថយការចម្លងវីរុសសម្រាប់ការដាំដុះនៅរដូវក្រោយ
-ក្នុងករណីមានការបំផ្លាញធ្ងន់ធ្ងរពីជំងឺម៉ូសាអ៊ិច គួរដាំដំណំាផ្សេងជំនួសដូចជាពពួកសណ្តែក ឬពោត នៅរដូវបន្ទាប់ ដើម្បីកាត់ផ្តាច់ជំងឺនេះ។

បន្ទាប់មក ក្រុមការងារ បានបន្តចុះពិនិត្យ ចម្ការបន្លែ និងការចិញ្ចឹមមាន់ របស់កសិករ ៣គ្រួសារ ផងដែរ។