កសិករទាំង ៣គ្រួសារ បានបង្ហាញពីក្តីសប្បាយរីករាយ ដោយសារដំណាំរបស់គាត់មានការលូតលាស់ល្អ ហើយតម្លៃសមរម្យនិងមានមន្ត្រីបច្ចេកទេសកសិកម្ម ចុះណែនាំជាប្រចាំ។

ឆ្លៀតក្នុងឱកាសនោះ ក្រុមការងារ បានផ្តល់ការណែនាំបន្ថែមមួយចំនួនដូចតទៅ ៖
១-សូមបងប្អូនប្រជាកសិករ ធ្វើការដាំដុះជាក្រុម មានស្លាកសញ្ញាសម្គាល់ផលិតផល រៀបចំផែនការដាំដុះកុំឲ្យជាន់គ្នា និងមានទំនាក់ទំនងទីផ្សារ ឲ្យបានជាប់លាប់។
២-ត្រូវបន្តអនុវត្តតាមបទដ្ឋានបច្ចេកទេសដាំដុះ ជាពិសេសការប្រើប្រាស់ធាតុចូលកសិកម្ម ដែលធានាឲ្យផលិតផលបន្លែរបស់យើងរក្សាបានសុវត្តិភាពសម្រាប់អ្នកបរិភោគ។ ក្រុមការងារបានលើកឡើងពី គោលការណ៍អនុវត្តកសិកម្មល្អ(GAP) ឬ គោលការណ៍ ប្រព័ន្ធធានាសុវត្ថិភាពដោយមានការចូលរួម(PGS) ដើម្បីសុវត្ថិភាពសម្រាប់ខ្លួនឯងផង សម្រាប់អ្នកបរិភោគបន្លែផង ហើយកំពុងទទួលបានការគាំទ្រពីអតិថិជន។
៣-ត្រូវសន្សំសំចៃទឹក ក្នុងការស្រោចស្រពបន្លែ តាមរយៈកែលម្អប្រព័ន្ធស្រោចស្រព។ ប្រុងប្រយ័ត្នក្នុងការបន្តដាំដុះ ជៀសវាងជួបហានិភ័យខ្វះទឹកស្រោចស្រព នៅពេលជិតប្រមូលផលព្រោះថ្មីៗនេះ រាជរដ្ឋាភិបាលនិងក្រសួងកសិកម្ម រុក្ខាប្រមាញ់ និងនេសាទ បានចេញសារាចរណែនាំនិងសេចក្តីណែនាំស្តីពីការសន្សំសំចៃទឹកក្នុងរដូវប្រាំង ឆ្នាំ២០១៩ នេះ។

តាមការពិនិត្យនិងក្តាប់ពីសភាពការណ៍ទឹក នៅតំបន់ទាំង ៣នេះ មិនទាន់ប្រឈមការខ្វះទឹកស្រោចស្រពដំណាំទេ។