ថ្ងៃទី២៧ ខែកុម្ភៈ ឆ្នាំ២០១៩នេះ លោក ជៀង សារិទ្ធ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ បានដឹកនាំមន្ត្រីជំនាញការិយាល័យផលិតកម្មនិងបសុព្យាបាលចុះពិនិត្យការតាំងលក់សាច់នៅផ្សារក្រុងសួង និងបានដឹកនាំប្រជុំផ្សព្វផ្សាយនូវសេចក្តីណែនាំរបស់ក្រសួងកសិកម្ម រុក្ខាប្រមាញ់ និងនេសាទ ស្តីពីវិធានការទប់ស្កាត់ការឆ្លងរាលដាលជំងឺប៉េស្តអាហ្វិច លើសត្វជ្រូក និងហានិភ័យជំងឺសត្វនារដូវក្តៅ ដល់មន្រី្តកសិកម្មស្រុក ក្រុង ក្រុមហ៊ុនដឹកជញ្ជូនសត្វ ម្ចាស់កសិកដ្ឋានចិញ្ចឹមសត្វ ម្ចាស់វិនិយោគទីសត្តឃាដ និងអាជីវករដឹកជញ្ជូនសត្វ។
សូមបញ្ជាក់ថា អង្គការស្បៀងអាហារនិងកសិកម្ម ហៅកាត់ថា FAO បានព្រមានថា ជំងឺប៉េស្តជ្រូកអាហ្វ្រិកដែលកើតឡើងនៅចិន អាចរីករាលដាលដល់ប្រទេសផ្សេង ទៀតនៅតំបន់អាស៊ី។ អង្គការនេះ ក៏បានឲ្យដឹងដែរថា មេរោគនេះធន់ខ្លាំង ហើយអាចរស់នៅបានយូរ ពោលគឺវាអាចស៊ាំនឹងអាកាសធាតុក្តៅខ្លាំង ត្រជាក់ខ្លាំង ហើយមិនត្រឹមតែប៉ុណ្ណោះ វាថែមទាំងអាចរស់នៅបានក្នុងផលិតផលសាច់ជ្រូកក្រៀមផងដែរ។
ជំងឺប៉េស្តជ្រូកអាហ្វ្រិកនេះ បានផ្ទុះខ្លាំងកាលពីទសវត្សឆ្នាំ១៩៦០ នៅអឺរ៉ុបនិងអាមេរិក។ ដោយសារតែមានប្រវត្តិនៃការផ្ទុះ និងការសាយភាយនៅតំបន់ផ្សេងៗគ្នាបែបនេះ ទើបអង្គការស្បៀងអាហារនិងកសិកម្ម យល់ថា ជំងឺនេះអាចរីករាល ដាលដល់ប្រទេសជិតខាង ជាពិសេសប្រទេសនៅតំបន់អាស៊ីអាគ្នេយ៍ និងឧប ទ្វីបកូរ៉េ ព្រោះប្រទេសក្នុងតំបន់ទាំងនេះមានតម្រូវការសាច់ជ្រូកខ្ពស់៕
