ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ អមដំណើរដោយថ្នាក់ ដឹកនាំក្រសួង អគ្គនាយកដ្ឋានកសិកម្ម និងមន្ត្រីជំនាញ ចុះពិនិត្យនិងក្តាប់បញ្ហាប្រឈមដែលត្រូវដោះស្រាយជូនប្រជាកសិករ សិប្បករ ក្នុងផលិតកម្មពោតក្រហម នៅស្រុកត្បូងឃ្មុំ ខេត្តត្បូងឃ្មុំ នារសៀលថ្ងៃសៅរ៍ ទី១៦ ខែកុម្ភៈ ឆ្នាំ២០១៩។

ក្នុងកម្មវិធីចុះពិនិត្យសិប្បកម្មសម្ងួតពោត របស់សិប្បករ សែន ស្រីណា នៅភូមិយាយស ឃុំទន្លេបិទ ស្រុកត្បូងឃ្មុំ លោកស្រី បានថ្លែងអំណរគុណចំពោះប្រមុខរាជ រដ្ឋាភិបាល ដែលបានបង្កលក្ខណៈងាយ ស្រួលដល់ដំណើរការកែច្នៃសម្ងួតពោត។ បច្ចុប្បន្នសិប្បកម្មលោកស្រី មានសមត្ថភាពសម្ងួតពោតប្រមាណ ៥ ០០០តោនក្នុងមួយឆ្នាំ (២៥តោន/ថ្ងៃ)បានមកពីការប្រមូលទិញ ពីកសិករដៃគូនិងកសិករក្នុងខេត្ត ហើយលក់ចេញទៅ ក្រុមហ៊ុនកែច្នៃចំណីសត្វក្នុងប្រទេស។ ជាមួយគ្នានេះ លោកស្រី បានសំណូមពរឯកឧត្តមរដ្ឋមន្ត្រី ជួយអន្តរាគមន៍ស្នើសុំបញ្ចុះតម្លៃអគ្គិសនីសម្រាប់សិប្បកម្មកែច្នៃ កាត់បន្ថយការនាំចូលពោតពីក្រៅប្រទេស សុំឲ្យមានឥណទានកសិកម្ម ការ ប្រាក់ទាប និងរកពូជពោតដែលមានអាយុកាលខ្លី និងទិន្នផលខ្ពស់។