ការរៀបចំទិវាស្រែនេះ ក្នុងគោលបំណង ដើម្បីផ្សព្វផ្សាយអំពីលក្ខណៈល្អនៃពូជស្រូវខា15 និងជំរុញការប្រើប្រាស់ ដល់ប្រជាកសិករ ក្រុមផលិតគ្រាប់ពូជ សហគមន៍កសិកម្ម និងផ្សព្វផ្សាយដល់អ្នកប្រមូលទិញស្រូវ ម្ចាស់រោងម៉ាស៊ីន និងអ្នកពាក់ព័ន្ធសំខាន់ៗដែលទាក់ទងនឹងខ្សែច្រវ៉ាក់តម្លៃផលិតកម្មស្រូវ។

ក្នុងឱកាសនោះដែរ គណៈអធិបតី បានផ្តល់ជាអនុសាសន៍តម្រង់ទិសមួយចំនួនដូចជា៖ -ការធ្វើស្រែដែលអនុវត្តតាមគោលការណ៍បច្ចេកទេស ដូចជា ការៀបចំដីបានស្មើល្អ គ្រាប់ពូជសុទ្ធ ការព្រោះតាមបច្ចេកទេស ប្រើប្រាស់ឧបករណ៍អូសដាំគ្រាប់(Drum Seeder) ការប្រើប្រាស់ជីបំប៉នត្រឹមត្រូវ ការតាមដានថែទាំបានជាប្រចាំការគ្រប់គ្រងសមាសភាពចង្រៃនិងប្រមូលផលតាមបច្ចេកទេស -ការផលិតស្រូវដោយចងក្រងជាក្រុមឬសហគមន៍ ដោយមានកិច្ចសន្យាផលិតកម្ម ដើម្បីមានផែនការផលិតត្រឹមត្រូវ កសិផលមានស្តហដារ និងនិរន្តរភាពទីផ្សារ -ដៃគូអភិវឌ្ឍន៍នានា អ្នកប្រមូលទិញ ម្ចាស់រោងម៉ាស៊ីនកិនស្រូវ សហគមន៍កសិកម្ម ឬក្រុមផលិតគ្រាប់ពូជស្រូវ និងប្រជាកសិករចូលរួមទាំងអស់គា្ន ជួយជំរុញនិងផ្សព្វផ្សាយពូជស្រូវខា១៥នេះ ដោយបង្កើនការផលិតឱ្យបានបរិមាណច្រើន ដើម្បីផ្គត់ផ្គង់តម្រូវការទីផ្សារក្នុងស្រុកផងនិងសម្រាប់ការនាំចេញអង្ករទៅលក់នៅទីផ្សារក្រៅប្រទេសផង។
-សហគមន៍កសិកម្ម ឬ ក្រុមកសិករ ត្រូវពិចារណាលើការផលិតពូជស្រូវដោយខ្លួន ឯង ដើម្បីកាត់បន្ថយការទិញពូជពីក្រៅ ដែលត្រូវចំណាយច្រើន និងរក្សាភាពសុទ្ធនៃពូជខ្ពស់។

សូមជម្រាបជូនថាពូជខា15 សិក្សាស្រាវជ្រាវបង្កាត់ដោយអ្នកស្រាវជ្រាវដំណាំស្រូវនៃវិទ្យាស្ថានស្រាវជ្រាវនិងអភិវឌ្ឍន៍កសិកម្មកម្ពុជានៃក្រសួងកសិកម្ម។ ខា15 ជាពូជស្រូវស្រាល មិនប្រកាន់រដូវ ធន់នឹងការប្រែប្រួលអាកាសធាតុ សត្វល្អិត ដើមឈរត្រង់ល្អ អង្ករ បាយទន់ មិនស្អិត រសជាតិឆ្ងាញ់។ តាមការស្ទង់ទិន្នផលស្រូវបង្ហាញនេះ ទទួលបានទិន្នផល 5,4តោន/ហិកតា(ស្រូវសើម)។

កម្មវិធីទិវាស្រែធ្វើនៅភូមិទួលថ្មី ឃុំជីគរ ស្រុកត្បូងឃ្មុំ ខេត្តត្បូងឃ្មុំ កាលពីព្រឹកថ្ងៃសុក្រ 8រោច ខែកត្តិក ឆ្នាំច សំរឹទ្ធិស័ក ពស 2562។