នៅថ្ងៃពុធ០៤កើត ខែចេត្រ ឆ្នាំច ព.ស២៥៦២​ ត្រូវនិងថ្ងៃទី១៨​ ខែមេសា ឆ្នាំ២០១៨
ក្រុមការងារ​គម្រោង​នៃមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ​ បានចុះពិនិត្យ និងណែនាំបច្ចេកទេសបន្ថែមដល់កសិករ នៅភូមិក្រញូង ឃុំវាលម្លូ ស្រុកពញាក្រែកនិង បានចុះពិនិត្យមើលការដាំដុះ និងការប្រមូលផល បន្លែរបស់ក្រុមកសិករនៅភូមិទំនាប ឃុំគងជ័យ ស្រុកអូររាំងឪ ។
ដោយក្នុងនោះមន្ត្រីយើងបាន ណែនាំពីរបៀបរៀបចំផែនការដាំដុះ ការរៀបចំដី ការប្រើប្រាស់ជី និងថ្នាំពុលគីមីជូនដល់ក្រុមកសិករក៏ដូចជាបានផ្តល់បច្ចេកទេសបន្ថែមដល់កសិករដាំបន្លែសុវត្ថិភាពដោយបានជំរុញឲ្យកសិករដាំដុះនូវមុខដំណាំដែលមានតម្លៃខ្ពស់នៅលើទីផ្សារ និងពន្យល់ពីបញ្ហាទីផ្សារ ដែលស្ថិតនៅភូមិទំនាប ឃុំគងជ័យ ស្រុកអូររាំងឪ ខេត្តត្បូងឃ្មុំ។ ក្នុងនោះលោក​ ហេង​ ពិសិដ្ឋ​ ប្រធានគម្រោងថ្នាក់ខេត្តក៏បានជំរុញឱ្យកសិករធ្វើផលិតថ្នាំពុលបំប៉ន ធម្មជាតិ ថ្នាំពុលគីមីធម្មជាតិ កំប៉ុស្តិ៍គោក សម្រាប់បាញ់បណ្ដេញសត្វល្អិតព្រមទាំងកម្ចាត់ និងដុតផេះអង្កាមយកមករោយលើរងដំណាំ ហើយទិញស្បៃគ្របរងបន្ថែម ដើម្បីកាត់បន្ថយការចំណាយថវិកាទៅទិញថ្នាំពុលគីមីច្រើន។ ម៉្យាងវិញទៀតក៏បានពន្យល់ពីការលើករងដំណាំត្រូវលើកឱ្យបានត្រង់ ពិនិត្យប្រព័ន្ធលំហូរទឹក អាងស្តុកទឹក ការថែទាំដំណាំដោយការកាត់ខ្នែងតូចៗផ្នែកខាងក្រោម សម្រាប់ដំណាំម្រះ ត្រសក់ ននោង ឃ្លោក ត្រឡាច ពពាយ ម្ទេសហាវៃ ត្រប់វែង និងប្រភេទបន្លែផ្សេងៗទៀត ដើម្បីជំរុញកាលូតលាស់ផ្លែបានល្អ និងស្រឡះល្អ កាត់បន្ថយជម្រកសត្វល្អិតចង្រៃ។